މި ސަރުކާރުން މިހާތަނަށް 2013 ބިދޭސިއަކު ޑީޕޯޓް ކޮށްފައިވާ ކަމަށް އިމްގްރޭޝަން ކޮންޓްރޯލާ މުހައްމަދު ޝައްމާން ވަހީދު ވިދާޅުވެއްޖެއެވެ.
ފުލުހުންނާއި ގުޅިގެން ނުގަވާއިދުން ރާއްޖޭގައި އުޅޭ ބިދޭސީން ހޯދުމަށް ހިންގާ އޮޕަރޭޝަންތަކުގެ ތަފްސީލް ހާމަކުރައްވަމުން ޝައްމާން ވިދާޅުވީ މިހާތަނަށް ގަވާއިދާއި ޚިލާފަށް އުޅޭ 2013 ބިދޭސީއަކު ޑީޕޯޓްކޮށްފައިވާ ކަމަށާއި އޭގެތެރޭގައި ސީރިއަށް ކްރައިމްތަކުގައި ޝަމިލްވާ އެތައް ބަޔަކު ހިމެނޭ ކަމަށެވެ.
ޝައްމާން ވިދާޅުވި ގޮތުގައި ފުލުހުންނާއި ގުޅިގެން އިމިގްރޭޝަނުން މިހާރު ހިންގާމުން އަންނަ އޮޕަރޭޝަން ހާއްސަކުރެވިފައި ވަނީ ދިވެއްސަކާ ނުގުޅި ރާއްޖޭގައި އަމިއްލައަށް ވިޔަފާރި ކުރާ ބިދޭސީންނާއި އެވިޔަފާރީގައި މަސައްކަތް ކުރާ ފަރާތްތައް ހޯދުމަށް ކަމަށެވެ. އަދި މި މަސައްކަތުގެ ތެރޭގައި ސީރިއަސް ކްރައިމްތަކަށް އަރައިގަންނަ ފަރާތްތައް ވެސް ފާހަގަވެފައިވާ ކަމަށް ޝައްމާން ވިދާޅުވިއެވެ.
އެގޮތުން މިދިޔަ ނޮވެމްބަރު މަހުގެ 17 ވަނަ ދުވަހުން ފެށިގެން މިމަހުގެ 11 ވަނަ ދުވަހާ ހަމައަށް 2013 ބިދޭސީއެއް ޑީޕޯޓްކޮށްފައިވާ ކަން ފާހަގަކުރައްވަމުން ޝައްމާން ވިދާޅުވީ މިހާރު ހިންގަމުންދާ އޮޕަރޭޝަންގެ ތެރެއިން 120 ފަރާތެއް ވަނީ އިމްގްރޭޝަންގެ ބެލުމުގެ ދަށަށް ގެނެސްފައިވާ ކަމަށާއި އެމީހުން ރާއްޖެއިން ޑީޕޯޓް ކުރުމުގެ މަސައްކަތް ކުރެވެމުންދާ ކަމަށެވެ.
ޝައްމާން ވިދާޅުވީ ގަވާއިދާއި ޚިލާފަށް އުޅޭ ބިދޭސީންނާއި ގުޅޭ އިތުރު ތަފްސީލް މިހަފްތާ ބާއްވާ ނޫސްވެރިންގެ ބައްދަލުވުމުގައި ހިއްސާ ކުރެވިގެންދާނެ ކަމަށެވެ.
