ޤާނޫނުން ބަޔާންކުރާ މުއްދަތުގައި އޮޑިޓް ރިޕޯޓު ހުށަހަޅާފައި ނުވާތީ ތިން ސިޔާސީ ޕާޓީއެއް އިލެކްޝަން ކޮމިޝަން (އީސީ)އިން ޖޫރިމަނާކޮށްފިއެވެ.
އިލެކްޝަންސް ކޮމިޝަނުން މި ކަން އިއުލާނު ކުރީ އެކްސްގައި ކުރި ޕޯސްޓެއް މެދުވެރިކޮށެވެ. އެ ޕޯސްޓްގައި ބުނެފައިވާ ގޮތުގައި މި 3 ޕާޓީ ވެސް ވަނީ ބައިލައްކަ ރުފިޔާއިން ޖޫރިމަނާކޮށްފައެވެ.
އެއީ ކުރީގެ ނައިބް ރައީސް އަޙްމަދު އަދީބުގެ ޕާޓީ، މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)އާއި މާފަންނު އުތުރު ދާއިރާގެ މެމްބަރު މުޙައްމަދު ނާޒިމް (ކާނަލް)ގެ ޕާޓީ މޯލްޑިވްސް ނެޝަނަލް ޕާޓީ (އެމްއެންޕީ) އަދި ކުރީގެ ރައީސް މުޙައްމަދު ނަޝީދު އިސްވެ ހުންނަވައި އުފައްދަވާފައިވާ ޕާޓީ ދަ ޑިމޮކްރެޓްސްއެވެ.
ޕާޓީގެ އަހަރީ ހިސާބުތައް ނުބަލަހައްޓައި ނުވަތަ ކޮމިޝަނަށް ހުށަހަޅަން ޖެހޭ މާލީ ރިޕޯޓުތައް ހުށަނާޅާ ނަމަ 20،000ރ. އާއި 50،000ރ. އާ ދެމެދުގެ އަދަދަކުން ޕާޓީތައް ޖޫރިމަނާކުރުމުގެ ބާރު އިސީއަށް ލިބިގެންވެއެވެ.
ސިޔާސީ ޕާޓީތަކުގެ ޤާނޫނުގައި ބުނާގޮތުން، ކޮންމެ މީލާދީ އަހަރެއް ނިމޭތާ 3 މަސް ތެރޭ ޕާޓީގެ އަހަރީ ހިސާބުތައް އޮޑިޓާ ޖެނެރަލް ޤަބޫލުކުރާ އޮޑިޓަރަކު މެދުވެރިކޮށް އޮޑިޓްކުރުމަށް ފަހު، އީސީއަށާއި އޮޑިޓާ ޖެނެރަލަށް ހުށަހަޅަން ޖެހެއެވެ.
