ފުލުހުންނަށް ޕްރޮމޯޝަން ދިނުން މަޑުޖައްސާލަން އެންޓި ކޮރަޕްޝަން ކޮމިޝަން (އޭސީސީ)އިން މިދިޔަ އަހަރު އެދިފައިވީ ނަމަވެސް، އެ ބާރު އޭސީސީއަށް ނޯންނާނެކަމަށް ދައުލަތުން ހައި ކޯޓުގައި ބުނެފިއެވެ.
ފުލުހުންނަށް ޕްރޮމޯޝަން ދިނުން މަޑުޖައްސާލަން އޭސީސީން ނެރުނު އަމުރަށް ފުލުހުން ތަބާވެފައެއް ނުވެއެވެ. އެ އަމުރު އޭސީސީއިން ފޮނުވާފައިވަނީ މިދިޔަ އަހަރުގެ އޮކްޓޫބަރު މަހުއެވެ.
އޭސީސީގެ އެންގުމަށް ފުލުހުން އަމަލުކުރަން ޖެހޭނެކަމަށް ކަނޑައަޅައިދިނުމަށް އެދި އޭސީސީން ސިވިލް ކޯޓަށް މައްސަލަ ހުށަހެޅީ ފުލުހުން އެ އަމުރަށް ތަބާ ނުވީމައެވެ. މައްސަލަ ނިމެންދެން، ޕްރޮމޯޝަންގެ މަސައްކަތްތައް މަޑުޖައްސާލަން އޭސީސީން އެދުނަސް އެ ފަދަ އަމުރެއް ނެރެދެވެން ނެތްކަމަށް ސިވިލް ކޯޓުން މިދިޔަ ޖަނަވަރީ މަހު ވަނީ އަންގާފައެވެ.
އެހެންކަމުން އޭއީސީއިން މި މައްސަލަ ހައި ކޯޓަށް އިސްތިއުނާފުކުރިއެވެ. އަދި މި މައްސަލައިގެ އަޑުއެހުމެއް ހައި ކޯޓުން އިއްޔެ ވަނީ ބާއްވާފައެވެ. އެ އަޑުއެހުމުގައި ދައުލަތުން ބުނީ، ދައުލަތުގެ މުއައްސަސާއަކުން ވަކި ކަމެއް ނުކުރަން ނުވަތަ މަޑުޖައްސާލަން އެންގުމުގެ ބާރު އޭސީސީގެ ގާނޫނުގެ ދަށުން އެ ކޮމިޝަނަށް ލިބިފައި ނުވާކަމަށެވެ. ސުޕްރީމް ކޯޓުން ވެސް ކުރިން އެ ގޮތަށް ނިންމާފައިވާކަމަށާއި، އެ ފަދަ އެންގުމެއް އެންގުމުގެ ބާރު ކޮމިޝަނަށް މި ވަގުތު ނެތްކަމަށް ދައުލަތުން ބުނެފައިވެއެވެ.
ދައުލަތުގެ ބަޔާނާ ގުޅިގެން އޭސީސީއިން ބުނީ ކޮރަޕްޝަނާ ގުޅުން ހުރި ހުރިހާ ކަމެއް ބެލުމުގެ ބާރު އެ ކޮމިޝަނަށް ލިބިގެންވާކަމަށެވެ. އަދި އެ ކޮމިޝަންގެ އެންގުމަށް ތަބާވާން ނުޖެހޭނެ ގޮތަކަށް ދައުލަތުގެ މުއައްސަސާތަކަށް އަމަލު ނުކުރެވޭނެކަމަށް ވެސް އޭސީސީއިން ވަނީ ބުނެފައެވެ. އޭސީސީން ބަލާ މައްސަލަތަކުގައި ވަކި ގޮތަކަށް އަންގަނީ އެ ކޮމިޝަނުން ބަލަންޖެހޭ ކަންކަމަށް ބެލުމަށް ފަހު، އެ ގޮތަށް އަންގަންޖެހޭ ހާލަތްތަކުގައިކަމަށް ވެސް އޭސީސީގެ ވަކީލު ވަނީ ބުނެފައެވެ.
ދައުލަތުން ބުނިގޮތުގައި، އޭސީސީން ސިވިލް ކޯޓަށް މައްސަލަ ހުށަހެޅި އިރު ވެސް ޕްރޮމޯޝަން ދިނުމުގެ މަސައްކަތް އޮތީ ނިމިފައެވެ. އެހެންކަމުން ވަގުތީ އަމުރު ނެރުނަސް، ދެން އިތުރަށް ކުރެވޭނެ ކަމެއް ސާފުނުވާކަމަށް ދައުލަތުން ބުންޏެވެ. ނަމަވެސް އެ ގޮތަށް ވަގުތީ އަމުރު ނެރެފި ނަމަ އެންމެ ބޮޑަށް ގެއްލުން ލިބޭނީ ފުލުހުންނާއި ދައުލަތަށްކަމަށާއި އެ ގޮތަށް އަމަލުކޮށްފި ނަމަ އެތައް ބައެއްގެ ޙައްޤަށް އަސަރު ކުރާނެކަމަށް ދައުލަތުން ބުންޏެވެ.
ދައުލަތުން އެދުނީ ސިވިލް ކޯޓުގެ ނިންމުން ދަމަހައްޓައި ދިނުމަށެވެ. މި މައްސަލައިގެ އިތުރު އަޑުއެހުމެއް ބޭއްވުމަށް ފަނޑިޔާރުންގެ ބެންޗުން ވަނީ ނިންމާފައެވެ.
ފުލުހުންގެ ތަފާސް ހިސާބުތައް ދައްކާ ގޮތުން އެކި ފަހަރު މަތިން 920 ފުލުހުންގެ ގްރޭޑް މަތިކޮށްފައިވެއެވެ. އަދި 539 ފުލުހުންގެ ރޭންކް މަތިކޮށްފައިވާކަމަށް ވެސް މައުލޫމާތު ލިބެއެވެ. މީގެ އިތުރުން ފުލުހުންގެ ހިދުމަތުގައި މަސައްކަތްކުރާ 168 އާންމު މުވައްޒަފެއްގެ މަގާމު ވެސް ފާއިތުވި ދުވަސްތަކުގައި މަތިކޮށްފައިވާކަން އެނގެން އެބަ ހުއްޓެވެ.
