ފެނަކަ ކޯޕަރޭޝަންގެ ކުރީގެ މެނޭޖްމަންޓާ ގުޅޭ ގޮތުން އާދަޔާ ޚިލާފަށް ގިނަ މައްސަލަތަކެއް އެންޓި ކޮރަޕްޝަން ކޮމިޝަނަށް ހުށަހަޅާފައިވާ ކަމަށް އެކޮމިޝަނުން މިއަދު ބުނެފިއެވެ.
ފެނަކަ ކޯޕަރޭޝަނާ ގުޅޭ ގޮތުން އާދަޔާހިލާފަށް އެ ކޮމިޝަނަށް މައްސަލަތައް ހުށަހަޅާފައިވާތީ އެ މައްސަލަތަކަށް ހާއްސަ ސަމާލުކަމެއް ދީގެން ބަލަމުން އަންނަ ކަމަށް އޭސީސީގެ ރައީސް އާދަމް ޝާމިލް ވިދާޅުވިއެވެ.
ޝާމިލް މިހެން ވިދާޅުވެފައި ވަނީ މިއަދު ރައްޔިތުންގެ މަޖިލީހުގެ އެސްއޯއީ ކޮމިޓީގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.
ޝާމިލް ވިދާޅުވީ އެމްޑީޕީގެ ސަރުކާރުގައި އެ ކުންފުނި ހިންގަވަން ތިއްބެވި ވެރިންނަށް ތުހުމަތުވާ ހަ މައްސަލައެއް އޭސީސީ އަށް ހުށަހަޅާފައިވާ ކަމަށާއި އޭގެ ތެރޭގައި ފެނަކަ އަށް ފައިދާ ވާން އޮތް ކަމެއްގައި އެ ނޫން ގޮތަކަށް އަމަލު ކޮށްގެން ވަކި މަގްސަދެއް ހާސިލް ކުރުމަށް މަސައްކަތް ކޮށްފައިވާ މައްސަލަތައް ހިމެނޭ ކަމަށެވެ.
“ހަ މައްސަލައެކޭ ދެންނެވިޔަސް ހަގީގަތުގައި ވަރަށް ބޮޑެތި މައްސަލަތަކުގެ ވާހަކަ. އޭގެ ބާވަތުން އެއް ކޮށްލާފައި ހުންނަ މައްސަލަތައް ވެސް އެބަހުރި،” އޭނާ ވިދާޅުވި އެވެ.
މީގެ އިތުރުން، ފެނަކައާ ގުޅޭ ގޮތުން ހުށަހަޅާފައިވާ މައްސަލަތަކުގެ ތެރޭގައި ބައެއް މަޝްރޫއުތައް ކުންފުނިން އަމިއްލަ އަށް ހިންގުމަށް އިންހައުސްކޮށް ކުރިޔަށް ގެންދަން ނިންމުން ހިމެނޭ ކަމަށް އޭސީސީގެ ނައިބު ރައީސް އަބްދުލް ސަލާމް ވިދާޅުވިއެވެ. އޭނާ ވިދާޅުވީ މިފަދައިން އިންހައުސްކޮށް މަޝްރޫޢުތައް ކުރިއަށް ގެންދިޔުމުގެ ބޭނުމަކީ ކޮންޓްރެކްޓް އުސޫލުން ގިނަ އަދަދެއްގެ މުވައްޒަފުންތަކެއް ނެގުން ކަމަށެވެ. އެހެން ނަމަވެސް ވަކި އަދަދެއް ކަނޑަނާޅައި މުވައްޒަފުން ނެގުމުން ބޮޑު ހަރަދުތަކެއް ހިނގާ ކަމަށް އޭނާ ވިދާޅުވިއެވެ.
” 15 މިލިއަން ރުފިޔާ އަށް ހެދޭ އިންޖީނުގެ ކުރިއަށް ނުގެންގޮސް ހުއްޓާލާފައި އިންހައުސް މުވައްޒަފުން ނަގައިގެން ކުރީމަ 38 މިލިއަނަށް އެބަހުރި އަގު ބޮޑުވެފައި. އަގު ބޮޑުވާ ސަބަބަކީ މުވައްޒަފުންގެ މުސާރަ އަށް،” ސަލާމް ވިދާޅުވި އެވެ.
ފެނަކައިން މުވައްޒަފުންނަށް ވަރަށް ބޮޑެތި ހަރަދުތަކެއް ކޮށްފައިވާކަން ފާހަގަކުރައްވާ ސަލާމް ވިދާޅުވީ އެ ފަރާތްތަކުގެ ކެއުމަށް ޑަބަލްކޮށް ފައިސާ ހަރަދު ކޮށްފައި ހުރި ކަމަށާއި ފައިސާ އަތަށް ދިނުމުގެ އިތުރުން ރަށުގެ ރެސްޓޯރަންޓުތަކަށް ވެސް ދެ ފަހަރަށް ފައިސާ ދައްކާފައިވާ މައްސަލަތައް ހުރި ކަމަށެވެ.
“މިއީ އެންމެ މަޝްރޫއެއްގައި ދިމާވާ މައްސަލައެއް ނޫން ވަރަށް ގިނަ މަޝްރޫއުތަކުގައި މި މައްސަލަ ފާހަގަ ކުރެވިފައި އެބަހުރި،” ސަލާމް ވިދާޅުވި އެވެ.
