އޮޅުވާލައިގެން ފައިސާ ފޭރި ސްކޭމްތައް ގިނަވެފައިވާތީވެ ކަމާބެހޭ ހުރިހާ ފަރާތްތައް ރައްޔިތުންގެ މަޖިލީހުގެ އެސްއޯއީ ކޮމެޓީއަށް ހާޒިރުކުރުމަށް އެ ކޮމެޓީން ނިންމައިފިއެވެ.
މިއަދު އެކޮމެޓީން ބާއްވާފައިވާ ބައްދަލުވުމުގައި އަމިއްލަ މީހުންގެ ބެންކް އެކައުންޓުތަކުން އެ ފަރާތްތަކަށް ނޭނގި ފައިސާ ގެއްލޭ މައްސަލައިގައި މަޖިލީހުގެ 19 ވަނަ ދައުރުގައި ކޮމެޓީން ތައްޔާރު ކޮށްފައިވާ ރިޕޯޓާމެދު ވަނީ މަޝްވަރާ ކޮށްފައެވެ.
މިއަދުގެ ބައްދަލުވުމުގައި އެ ރިޕޯޓު ބަލާ ޗެކު ކުރުމަށްފަހު މެންބަރުން ވަނީ ބީއެމްއެލްއާއި ގުޅޭގޮތުން އާންމު ރައްޔިތުން ކުރަމުންދާ ޝަކުވާތަކުގެ އިތުރުން އިތުރު ބައެއް ކަންބޮޑުވުންތައް ވެސް ފާހަގަ ކުރައްވާފައެވެ.
މެންބަރުން މަޝްވަރާކުރުމަށްފަހު ވެސް ސްކޭމްގެ މައްސަލައަށް ހައްލެއް ލިބިފައިނުވާތީ ބީއެމްއެލް ކޮމެޓީއަށް ހާޒިރު ކުރުމަށް މާވަށު ދާއިރާގެ މެންބަރު އަހްމަދު ޝާކިރު ވަނީ ހުށަހެޅުއްވާފައެވެ. އަދި ކޮމެޓީގެ މުގައްރިރު އާއި ބާރަށު ދާއިރާގެ މެމްބަރު އިބްރާހިމް ޝުޖާއު ވަނީ ބީއެމްއެލްގެ އިތުރުން، ފުލުހުންނާއި ކަރެކްޝަންސް އަދި އެމްއެމްއޭގެ އިސްވެރިން ކޮމެޓީއަށް ހާޒިރު ކުރުމަށް ސިޓީ ފޮނުވުމަށް ހުށަހަޅުއްވާފައެވެ. އެހެންކަމުން ކޮމެޓީން ފާސްކޮށްފައިވަނީ ބީއެމްއެލް އާއިއެކު، ފުލުހުންނާއި ކަރެކްޝަންސް އަދި އެމްއެމްއޭގެ އިސްވެރިން ކޮމެޓީއަށް ހާޒިރު ކުރުމަށެވެ.
މިއަދުގެ ބައްދަލުވުމުގައި މެންބަރުންވަނީ ބީއެމްއެލްއަކީ ރައްޔިތުންގެ އިތުބާރު ލިބިފައިވާ ކުންފުންޏަކަށް ހެދުމަށް މަސައްކަތްތަކެއް ކުރަން ޖެހޭކަމަށް ފާހަގަކޮށްފައެވެ.
