ރާއްޖޭގެ އިޤްތިޞާދު ނާޒުކު ހާލަތެއްގައި އޮތް މި ދަނޑިވަޅުގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަލީ ހާޝިމް ގާބިލު ނޫންކަމަށް ކަނޑައަޅައި، ވަކިކުރަން ނިންމުމަކީ މި ސަރުކާރުގެ ދުރު ރާސްތާ ވިސްނުމެއް ނެތްކަމުގެ ނިޝާނެއްކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ.
ފައްޔާޒު މިހެން ވިދާޅުވީ އިއްޔެ އެކްސްގައި ކުރެއްވި ޕޯސްޓެއްގައެވެ. ހާޝިމް ވަކިކުރުމަކީ މާލީ އިދާރާތައް ހަލަބޮލިކުރުންކަމަށާއި އެއީ މި ސަރުކާރުގެ ދުރުވިސްނުމެއް ނެތްކަމުގެ އިތުރު ހެތްކެއްކަމަށް ފައްޔާޒު ވިދާޅުވެފައިވެއެވެ. އަދި ސަރުކާރުން މިހާރަށް ވުރެ ވިސްނުންތެރިކޮށް އަމަލު ކުރަން ޖެހޭކަމަށް ވެސް ފައްޔާޒު ވިދާޅުވިއެވެ.
“މިފަދަ ނުރައްކާތެރި ފިޔަވަޅު ނޭޅުމަށް ރައީސް ޑރ. މުޙައްމަދު މުއިއްޒުގެ ސަރުކާރާއި ވެރިކަން ކުރާ ޕާޓީއަށް އަޅުގަނޑު ގޮވާލަން،” ފައްޔާޒު ވިދާޅުވިއެވެ.
“މާލީ އިދާރާތައް ނުތަނަވަސްކަމުގެ ތެރެއަށް ވެއްޓެނީ މި ސަރުކާރުން ގެންގުޅޭ އަވަސް އަރުވާލައިގެން ކަންކަން ނިންމުމުގެ ސިޔާސަތުގެ ސަބަބުން، މިފަދަ ކަންކަމުގައި މިއަށް ވުރެ ފަރުވާތެރި ވިސްނުމެއް ގެންގުޅެންޖެހޭ،” ފައްޔާޒުގެ ޕޯސްޓުގައި ލިޔުއްވާފައިވެއެވެ.
ގަވަރުނަރުކަމުގެ މަގާމުން ހާޝިމް ވަކި ކުރަން ރައީސް މުއިއްޒުއަށް ލަފާ ދޭން މަޖިލީހުގެ މާލިއްޔަތު ކޮމެޓީން އިއްޔެ ނިންމީ އެ ކޮމިޓީއަށް ހާޒިރުވާން އޭނާއަށް 4 ފަހަރަކު ފުރުސަތު ދިނުމަށް ފަހުގައެވެ. ކޮމިޓީއަށް ހާޒިރުވާން ހާޝިމް އުޒުރުވެރިވެވަޑައިގަތުމުން ކޮމިޓީގެ މެންބަރުން ވަރަށް ބޮޑަށް ނުރުހުން ފާޅުކުރައްވައި، އޭނާއަކީ މަގާމުގެ މަސްއޫލިއްޔަތު އަދާކުރައްވަން ގާބިލު ބޭފުޅެއް ނޫންކަމަށާއި ވީހާ ވެސް އަވަހަށް އޭނާ މަގާމުން ވަކިކުރަން ޖެހޭކަމަށް ވިދާޅުވެފައިވެއެވެ.
މާލީ ހާލަތު ރަނގަޅުކުރަން އެމްއެމްއޭއިން އިސްނަގައިގެން ލަފައެއް ދީފައި ނުވާކަމަށް މާލީ ވުޒާރާއިން ވަނީ ހާމަކޮށްފައެވެ. ނަމަވެސް މާލީ ހާލަތާ ގުޅޭ ގޮތުން ލަފާދެއްވާކަމަށާއި މި ހާލަތަށް ކަންކަން ވެއްޓުނީ ދެއްވި ލަފައާ އެއްގޮތަށް ސަރުކާރުން އަމަލުނުކުރުމުންކަމަށް ވިދާޅުވެ، ހާޝިމް ވަނީ އިއްޔެ ކޮމިޓީއަށް ސިޓީއެއް ފޮނުއްވައިފައެވެ. ހާޝިމް މަޖިލީހަށް ފޮނުއްވި ސިޓީގައި ވިދާޅުވީ، އިޤްތިޞާދީ ކާރިސާއެއް އައުމުގެ ކުރިން އެ ފަދަ ހާލަތަކުން ގައުމު ސަލާމަތްކުރަން ބޭނުންވާ މައުލޫމާތާއި އިރުޝާދު ދީ، އަޅަން ޖެހޭ ފިޔަވަޅުތައް އެޅުމުގެ މުހިންމުކަން އެމްއެމްއޭއިން ސަރުކާރާ ހިއްސާކޮށްފައިވާނެކަމަށެވެ.
