ފުލުހުންގެ ޚާއްސަ އޮޕަޜޭޝަނެއްގައި ގިނަ އަދަދެއްގެ މަސްތުވާތަކެއްޗާއެކު ހުޅުމާލެއިން 7 މީހަކު ހައްޔަރުކޮށްފިއެވެ.
ފުލުހުން ވިދާޅުވީ، ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން މި މަހުގެ 16 ވަނަ ދުވަހު ހިންގި އޮޕަރޭޝަނެއްގެ ތެރެއިން ގިނަ އަދަދެއްގެ މަސްތުވާތަކެއްޗާއެކު ހުޅުމާލެއިން 7 މީހުން ހައްޔަރުކޮށްފައިވާކަމަށެވެ.
އެގޮތުން ފުލުހުންގެ ޑްރަގް އެންފޯސްމަންޓާއި އިންޓެލިޖެންސް ގުޅިގެން ހިންގި އެ އޮޕަރޭޝަނުގައި މަސްތުވާތަކެތި ވިއްކައި ވިޔަފާރިކުރާކަމަށް ތުހުމަތުކުރެވޭ މައްސަލަައެއްގައި ހުޅުމާލޭގެ ދެ އެޕާޓްމަންޓަކާއި ދެ ކާރު ކޯޓު އަމުރެއްގެ ދަށުން ބަލައިފާސްކޮށްފައިވާ ކަމަށް ފުލުހުން ވިދާޅުވިއެވެ.
އަދި އަތުލައިގަނެވުނު މަސްތުވާތަކެތީގެ ބެލެވޭ ބަރުދަން 1085.71 ކިލޯއަށް އަރާ ކަމުގައިވެސް އެ އިދާރާއިން ވިދާޅުވެއެވެ.
އަދި މި އޮޕަރޭޝަންގައި ހައްޔަރު ކުރި 7 މީހުންނަކީ އުމުރުން 18 އަހަރާއި 30 އަހަރާއި ދެމެދުގެ މީހުންކަމަށް ވިދާޅުވެ، ފުލުހުން ވަނީ އެމީހުންގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އެ އެންމެންވެސް 10 ދުވަހަށް ބަންދުކުރުމަށް އެ ކޯޓުން އަމުރުކޮށްފައިވާކަމަށެވެ.
އަދި މި މައްސަލަ ފުލުހުންގެ ޑްރަގް އެންފޯސްމަންޓުން ތަހުގީގުކުރަމުން އަންނަކަމަށް އެ ފަރާތުން ވިދާޅުވެފައިވެއެވެ.
