ހުޅުމާލޭގެ ގަރާޖެއްގެ މަތީގައި ބިދޭސީންތަކެއް ހިންގަމުންދިޔަ ކާބޯތަކެތި ޑެލިވަރީ ކުރާ ތަނެއް ބަލައިފާސްކުރުމަށް ފަހު، އެ މަސައްކަތް ކުރަމުން ދިޔަ މީހުން އިމިގްރޭޝަންގެ ބެލުމުގެ ދަށަށް ގެނެސްފިއެވެ.
ވެހިކަލް މަރާމާތުކުރާ ގަރާޖަކާއި އެ ތަނުގެ މަތީގައި ހިންގަމުން ދިޔަ ކާބޯތަކެތި ބަންދުކޮށް ޑެލިވަރީ ކުރުމުގެ މަސައްކަތް ކުރަމުން ދިޔަ ތަނެއް މޯލްޑިވްސް އިމިގްރޭޝަނުން ބަލައި ފާސްކޮށްފައި ވަނީ މޯލްޑިވްސް އިމިގްރޭޝަނަށް ލިބުނު ޝަކުވާއަކާ ގުޅިގެންނެވެ. އިމިގްރޭޝަނުން ބުނި ގޮތުގައި، އެ އިމާރާތާ ބެހޭ މައުލޫމާތު އިމިގްރޭޝަނަށް ލިބުނީ ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައުލޫމާތު އިމިގްރޭޝަނާ ހިއްސާ ކުރުމަށް މިދިޔަ ބުދަ ދުވަހު ތައާރަފުކުރި “އިމިގްރޭޝަން ވޮޗް” ޕޯޓަލްއަށް ލިބުނު މައުލޫމާތަކާ ގުޅިގެންނެވެ. ނަމަވެސް އެ އިމާރާތް ހުންނަ ސަރަހައްދެއް އިމިގްރޭޝަނުން ހާމައެއް ނުކުރެއެވެ.
އިމިގްރޭޝަނުން އިއްޔެ ހާމަކުރި ގޮތުގައި، އެ ކެފޭއާ ގުޅޭ ގޮތުން ލިބުނު މައުލޫމާތާ ގުޅިގެން އެ ތަނަށް އިމިގްރޭޝަން އޮފިސަރުން ދިޔަ އިރު، ބިދޭސީން އުޅެނީ އެ ތަން ރޫޅާލައި ހުސްކުރުމުގެ މަސައްކަތް ކުރަމުގައެވެ.
އެ އިމާރާތުން ޖުމްލަ 11 މީހަކު އިމިގްރޭޝަންގެ ބެލުމުގެ ދަށަށް ގެންދިޔަކަމަށް އިމިގްރޭޝަނުން ބުންޏެވެ. އެއީ ގަވާއިދާ ހިލާފަށް ކާބޯތަކެތި ޑެލިވަރީ ކުރާ ތަނުގައި ތިބި 8 ބިދޭސީއަކާއި ގަރާޖުގައި މަސައްކަތް ކުރަމުން ދިޔަ 3 މީހެކެވެ.
24 ގަޑިއިރު ބޭނުން ކުރެވޭ ގޮތަށް އިމުގާ ވެބްސައިޓުގައި ގާއިމު ކުރި “އިމިގްރޭޝަން ވޮޗް” ޕޯޓަލްއަށް ޝަކުވާ ހުށަހަޅާ މީހާގެ އަމިއްލަ މައުލޫމާތު ނުހިމަނާ ވެސް ޝަކުވާ ހުށަހެޅޭނެއެވެ. އިމިގްރޭޝަންގެ ހިދުމަތާ ގުޅޭ ކޮންމެ ޝަކުވާއެއް ވެސް އެ ޕޯޓަލަށް ހުށަހެޅޭނެއެވެ.
