ދުނިޔޭގެ އައިޓީ ސިސްޓަމްތަކަށް ދިމާވި މައްސަލަތަކެއްގެ ސަބަބުން ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އޮޕަރޭޝަންސް ތަކަށް ބުރޫ އަރާ ބައެއް ހިދުމަތްތައް ފޯރުކޯށްދިނުމުގައި ލަސްވެދާނެކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން މިއަދު ބުނެފިއެވެ.
އެމްއޭސީއެލް އިން މިހެން ބުނެފައިވަނީ ދުނިޔޭގެ އައިޓީ ސިސްޓަމްތަކަށް ދިމާވި މައްސަލައަކާއި ގުޅިގެންނެވެ. މިއަދު އެކްސްގައި ކުރި ޕޯސްޓެއްގައި އެކުންފުނިން ބުނެފައިވަނީ މިމައްސަލައިގެ ސަބަބުން ޗެކިންވުމުގައި ލަސްތަކެއް ކުރިމަތިވެދާނެ ކަމަށާއި އެކަމުގެ ސަބަބުން ދިމާވެދާނެ ދަތިތަކަށް އެ ކުންފުނިން މާފަށް އެދޭ ކަމަށެވެ.
މިމައްސަލަތަކުގެ ސަބަބުން ދުނިޔޭގެ ބޮޑެތި އެއާޕޯޓުތައް މަޑުޖެހުމަށް އައިސްފައިވާއިރު، މިމައްސަލަ މިފަދައިން ދިމާވި ސީދާ ސަބަބުން ދެނެގަނެވިފައި ނުވާކަމަށް ބޭރުގެ ބައެއް ނޫސްތަކުން ރިޕޯޓްކޮށްފައިވެއެވެ. އެހެންނަމަވެސް ބައެއް ނޫސްތަކުން ރިޕޯޓްކޮށްފައިވާ ގޮތުގައި ބެލެވޭގޮތުން މިއީ މިއީ މައިކްރޯސޮފްޓް ވިންޑޯސްއާ ގުޅިފައިވާ މައްސަލައެކެވެ.
ދުނިޔޭގެ އައިޓީ ސިސްޓަމްއަށް ދިމާވި މައްސަލައިގެ ސަބަބުން ބުރޫ އަރާފައިވަނީ ހަމައެކަނި އެއާލައިންތަކާއި އެއާޕޯޓްތަކުގެ އޮޕަރޭޝަންއަށް އެކަންޏެއް ނޫނެވެ. މިމައްސަލާއިގެ ސަބަބުން ބޭންކިންގް ސިސްޓަމްތަކަށާއި ސިއްހީ ހިދުމަތްދޭ ހޮސްޕިޓަލުތަކުގެ އޮޕަރޭޝަންއަށް ވެސް ވަނީ އަސަރުކޮށްފައެވެ.
