މޯލްޑިވްސް އިންޑަސްޓްރިއަލް ފިޝަރީސް ކޮމްޕެނީ (މިފްކޯ)ގެ ހިންގުން ހަރުދަނާ ކުރުމަށްޓަކައި ކުރިއަށް ގެންދާ “މިފްކޯ އެފިޝަންސީ އެކްސަސައިޒް”ގެ ދަށުން ޚާއްޞަ ފިޔަވަޅުތަކެއް އެޅުމަށް އެ ކުންފުނީގެ ޑިރެކްޓަރުންގެ ބޯޑުން މިދިޔަ ބުދަ ދުވަހު ނިންމައިފިއެވެ.
މިފްކޯގެ ބޯޑުން މި ފިޔަވަޅުތަކާ ބެހޭ މައުލޫމާތު ހިއްސާކޮށް، މިދިޔަ ބުރާސްފަތި ދުވަހު އެ ކުންފުނީގެ ހުރިހާ މުވައްޒަފުންނަށް ވަނީ މެމޯއެއް ފޮނުވާފައެވެ. އެ މެމޯގައި ބަޔާންކޮށްފައިވާ ގޮތުގައި މަސައްކަތުގެ ފެންވަރު ދަށް މުވައްޒަފުން ވަޒީފާއިން ވަކިކުރުމާއި އިސްވެރިންގެ މުސާރަ ކުޑަކުރުން، އަލަށް ގެނައި ބަދަލުތަކުގެ ތެރޭގައި ހިމެނެއެވެ.
މި ކަމާ ބެހޭގޮތުން ރާއްޖޭގެ ނޫހަކަށް ދިން ބަސްދީގަތުމެއްގައި މިފްކޯގެ މީޑިއާ އޮފިޝަލް އިބްރާހިމް ސައީދު ވިދާޅުވީ މި ކަމުގައި އެއްވެސް އޮޅުވާލުމެއް އެ ކުންފުނިން ނުގެންގުޅޭކަމަށެވެ. އަދި ކުންފުނީގެ މައްސަލަތައް ދެނެގަނެ އިސްރާފު ކުޑަކުރުމަށް އެ ކުންފުނިން ސިލްސިލާކޮށް މަސައްކަތްތަކެއް ކުރަމުން އަންނަކަމަށް ސައީދު ވިދާޅުވެފައިވެއެވެ. ހަމައެހެންމެ މި ނިންމުމާ ގުޅިގެން އާދައިގެ މުވައްޒަފެއްގެ މުސާރައަށް އެއްވެސް ބަދަލެއް ނާންނާނެކަމަށާއި މުސާރަ ކުޑަ ކުރާނީ ޖެނެރަލް މެނޭޖަރާއި ސީނިއާ މެނޭޖުމަންޓް ލެވަލްގައި މަސައްކަތްކުރާ މުވައްޒުންގެ އެކަނިކަމަށް ސައީދު ވިދާޅުވިއެވެ.
މިފްކޯގެ ބޯޑުން އަޅަން ނިންމާފައިވާ ފިޔަވަޅުތަކުގެ ތެރޭގައި މިފްކޯގެ ސީއީއޯއިން ފެށިގެން ސީނިއާ މެނޭޖަރުންގެ ރޭންކުގައި ހިމެނޭ މުވައްޒަފުންނާ އެކު، ސީނިއާ އަދި މެދު ފަންތީގެ މެނޭޖްމަންޓްގެ ވެރިންގެ އަސާސީ މުސާރައިން 20 އިންސައްތަ ދަށްކުރުން ހިމެނެއެވެ. އަދި މުވައްޒަފުންގެ މުސާރައިގެ އޮނިގަނޑުގައި ހުރި ފަރަގުތައް ކުޑަކުރުމަށްޓަކައި އޮނިގަނޑަށް އިސްލާހު ގެނައުން ހިމެނެއެވެ.
މިފްކޯގެ ޑިރެކްޓަރުންގެ ބޯޑުން އިތުރަށް ނިންމި ބައެއް ނިންމުންތައް:
- ރިޓަޔަމަންޓު އުމުރު ހަމަވުމަށް ފަހު ކޮންޓްރެކްޓް މުވައްޒަފުންގެ ގޮތުގައި ތިބި މީހުންނަށް 3 މަހުގެ ނޯޓިސް ދިނުމަށް ފަހު އެ މީހުން ވަޒީފާއިން ވަކިކުރުން.
- ޚާއްޞަ ހާލަތްތަކުގައި މެނުވީ ކޮންޓްރެކްޓް މުވައްޒަފުން ނުނެގުން. އަދި ކޮންޓްރެކްޓް މުވައްޒަފުންގެ ތެރެއިން ކުންފުންޏަށް ކޮންމެހެން ބޭނުންވާ މުވައްޒަފުން ފިޔަވައި އެހެން މީހުންގެ ކޮންޓްރެކްޓް މި މަހުގެ ފަހުން އާ ނުކުރުން.
- ޕްރޮބޭޝަންގައި ތިބި މުވައްޒަފުންގެ ތެރެއިން ކޮންމެހެން ކުންފުންޏަށް ބޭނުންވާ މުވައްޒަފުން ފިޔަވާ އެހެން މުވައްޒަފުން ވަކިކުރުން.
- އިތުރު ގަޑީގައި ކޮންމެހެން ޖެހިގެން ނޫނީ މަސައްކަތް ނުކުރުވުން.
- އަމިއްލަ އިހުތިޔާރުގައި ވަޒީފާއިން ވަކިވާން ބޭނުންވާ މީހުންނަށް 3 މަހުގެ ޕެކޭޖަކާ އެކު ވަކިވުމުގެ ފުރުސަތު ދޭން ހުޅުވާލުން.
މީގެ އިތުރުން މިފްކޯގެ ބޯޑުން ވަނީ ގިނަ އެލޮވެންސްތަކެއް ވެސް ކަނޑާލުމަށް ނިންމާފައެވެ. އެއީ:
- ޑެޕިއުޓީ ހެޑް އެލަވަންސް
- އިންޖީނިއަރިން އެލަވަންސް
- ކޭން ޕްރޮޑަކްޝަން އެލަވަންސް
- ރިސްކް އެލަވަންސް
- ނޮން ޕްރެކްޓިސް އެލަވަންސް
- ވިލިމާލެ ފެރީ އެލަވަންސް ފިޔަވައި އެހެން ހުރިހާ ފެރީ އެލަވަންސްތަކެއް
“މިފްކޯ އެފިޝަންސީ އެކްސަސައިޒް”އަކީ ފިނޭންސް މިނިސްޓްރީއާއި ފިޝަރީޒް މިނިސްޓްރީ އަދި މިފްކޯ ގުޅިގެން މިފްކޯގެ ހިންގުން ހަރުދަނާކުރުމަށްޓަކައި ކުރިއަށް ގެންދާ ޕްރޮގްރާމެކެވެ.
