ސްޓެލްކޯއިން ކުރިއަށް ގެންދަ ކަރަންޓް ވިއުގަރ އަޕްގްރޭޑް ކުރުމުގެ މަސައްކަތް މިއަދު ކުރިއަށްދާތީ އެވަގުތު ތަކުގައި މާލެއާއި ހުޅުމާލޭގެ ބައެއް ސަރަހައްދުތަކުން ކަރަންޓް ކެނޑިދާނެކަމުގައި ސްޓެލްކޯއި ބުނެފިއެވެ.
އެކުންފުނިން ބުނީ، މާލޭގެ އިތުރުން ހުޅުމާލޭގެ ބައެއް ސަރަހައްދުތަކުގެ ކަރަންޓް ވިއުގަރ އަޕްގްރޭޑް ކުރުމުގެ މަސައްކަތް ކުރިއަށްދާތީ އެ މަސައްކަތް ކުރަމުންދާ ވަގުތުތަކުގައި ކަރަންޓް ކެނޑުމަކީ އެކަށީގެންވާ ކަމެއް ކަމަށެވެ.
އެގޮތުން ހުޅުމާލޭ އެއްވަނަ ފިޔަވަހީ، ހިތިގަސް މަގު، ހުވަނދުމާ ހިނގުން، ކިނބިގަސް މަގު އަދި ފިލިގަސް މަގު ހިމެނޭ ސަރަހައްދުތަކުން މިއަދު ހެނދުނު 10:00އި 11:00 ދެމެދު ކަރަންޓް ކެނޑުމަކީ އެކަށީގެންވާކަމެއް ކަމަށް އެ ކުންފުނިން ބުނެއެވެ.
މީގެ އިތުރުން މާލޭ، ބޮޑުތަކުރުފާނު މަގާއި، ސޯސަން މަގު، އަމީރު އަހުމަދު މަގު، ކަސްތޫރި މަގު، ހިތްފަސޭހަ ގޯޅި އަދި ފިނި ހިޔާ ގޯޅި ހިމެނޭ ސަރަހައްދުތަކުން މިއަދު މެންދުރު ފަހު 14:00 އިން 15:15 އަށް ކަރަންޓް ކެނޑިދާނެ ކަމަށްވެސް އެ ކުންފުނިން ވަނީ ބުނެފައެވެ.
އަދި ކަރަންޓް ކެނޑުމުގެ ސަބަބުން ދިމާވެދާނެ ދަތިތަކަށްވެސް އެ ކުންފުނިން ވަނީ މަޢާފަށް އެދިފައެވެ.
