“ނާރެސް” އާއެކު ދިވެހިރައްޔިތެއްކަން އަންގައިދޭ ކާޑި ނުހެއްދި ދިގުލައިގެން ދިއުމުގެ ކަނބޮޑުވުމަށް ޙައްލެއް ލިބިގެންދާނެ ކަމަށާއި ދެން އައިޑީކާޑު ނުހެއްދި 24 ގަދި އިރަށްވުރެ ދިގުލައިގެން ނުދާނެކަމުގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާނު ވިދާޅުވެއްޖެއެވެ.
އޮޕަރޭޝަން “ކުރަނގި”ގެ ދެވަނަ ފިޔަވަހި އިފްތިތާހުކުރުމަށާއި ސަރުކާރުގެ “ނާރެސް” އެޕްލިކޭޝަން އިފްތިތާހްކުރުމަށް ދަރުބާރުގޭގައި ރޭ ބޭއްވި ރަސްމިޔާތުގައި ދެއްކެވި ވާހަކަފުޅުގައި އައިޑީކާށުގެ މަސައްކަތާއި އެ ވުޒާރާއިން ހަވާލުވިއިރު ޖުމުލަ 3،348 އައިޑީކާޑު ޕްރިންޓް ނުކުރެވި އޮތްކަން ފާހަގަކުރައްވައު ވަޒީރު ވިދާޅުވީ، ނާރެސް އެޕްލިކޭޝަނާއެކު އެ މައްސަލައަށް ދާއިމީ ޙައްލެއް ލިބިގެންދާނެކަމަށެވެ.
އެގޮތުން ކާޑު ޕްރިންޓް ނުކުރެވި 24 ގަޑިއިރަށް ވުރެ ދެން ދިގުލައިގެން ނުދާނެކަން ފާހަގަ ކުރައްވައި ވަޒީރު ވިދާޅުވީ، “ނާރެސް” އެޕްލިކޭޝަން މެދުވެރިކޮށް މިހާރު ރާއްޖޭގެ ކޮންމެ ހިސާބެއްގައި ހުރެގެން ވެސް އައިޑީކާޑު ހެއްދުމަށް ހުށަހަޅައި އެ މަސައްކަތް އޮތް ހިސާބު ބަލާލެވޭނެ ކަމަށެވެ.
މީގެ އިތުރުން އީފާސް މެދުވެރިކޮށް އައިޑީ ކާޑު ހެއްދުމަށް އެދި ހުށަހެޅުމުގެ އިމްތިޒާމުން އުމުރުން ދުވަސްވީ ފަރާތްތަކަށް ކުރިމަތިވި ދަތިތަކަށްވެސް ނާރެސް އެޕްލިކޭޝަނުން ލުއި ލިބެގެން ދާނެ ކަމަށްވެސް ވަޒީރު ވިދާޅުވިއެވެ.
މީގެ އިތުރުންވެސް އަލަށް ތަޢާރަފް ކުރެވިގެން މިދިޔަ ނާރެސް ޕޯޓަލަށް ކައުންސިލްތައް ހޭލުންތެރިކުރުމަށް މިއަދު ބައްދަލުވުމެއް ބާއްވާނެ ކަމަށާއި އެ ބައްދަލުވުމުގައި ޕޯޓަލް ބޭނުން ކުރާނެ ގޮތާއި ނާރެސް ބޭނުންކޮށްގެން ޑިޕާޓްމެންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު)އާ ވާހަކަދައްކާނެ ގޮތްތަކަށް އަހުލުވެރިކުރެވޭނެ ކަމަށް ރޭގެ ރަސްމިޔާތުގައި ވާހަކަފުޅު ދައްކަވަމުން ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފް އުމަރު ވަނީ ވިދާޅުވެފައެވެ.
