އިއްޔެ ކުރިއަށް ދިޔަ ލޯކަލްކައުސިންތަކުގެ ބައި އިލެކްޝަންސްގައި އެމްޑީޕީއަށް ލިބުނު ނަތީޖާއާއި މެދު މާޔޫސްވާންވީ އެއްވެސް ސަބަބެއް ނެތް ކަމުގައި އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.
އިއްޔެ ކުރިއަށް ދިޔައީ، މާލޭ ސިޓީ ކައުންސިލުގެ ތިން ގޮނޑިއަކަށް މެމްބަރުން އިންތިޚާބު ކުރުމާއި، ފ. ބިލެތްދޫ ކައުންސިލްގެ ރައީސާއި، ކުޅުދުއްފުށި ސިޓީ ކައުންސިލްގެ އުތުރު ދާއިރާ ކައުންސިލް މެންބަރު އަދި ރ. ރަސްމާދޫ ކައުންސިލްގެ އަންހެން މެންބަރު ހޮވުމުގެ ބައި-އިލެކްޝަންގެ ވޯޓުލުމެވެ.
މި 6 ގޮނޑީގެ ތެރެއިން 5 ގޮނޑި ކަމިޔާބުކުރީ ވެރިކަން ކުރަ ޕާޓީ، ޕީއެންސީގެ މެމްބަރުންނެވެ. 1 ގޮނޑި އަމިއްލަގޮތުން އިންތިޚާބުގައި ވާދަކުރެއްވި މެމްބަރަކަށް ލިބުނު އިރު އެމްޑީޕީއަށް އެންމެ ގޮނޑިއެއްވެސް ނުލިބެއެވެ.
އިންތިޚާބުތަކުގެ ނަތީޖާއާ ގުޅިގެން އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ، މަދު އަދަދެއްގެ ބަޔަކު ވޯޓުލީ އިންތިޚާބުގެ ނަތީޖާ ނުކުތް ގޮތަކާ މެދު މާޔޫސްވާންވީ ސަބަބެއް ނެތްކަމަށެވެ. އަދި، ޕާޓީގެ ހިންގުން ހަރުދަނާކުރުމަށް މިހާރު ކުރެވޭ މަސައްކަތްތަކުގެ ތެރެއިން އެމްޑީޕީއަށް ކުރިއަށް އޮތީ ކާމިޔާބު ދުވަސްތަކެއް ކަމަށް އޭނާ ވިދާޅުވިއެވެ.
އަދި ކައުންސިލް ބައި-އިލެކްޝަންތަކުގައި ވާދަކުރި އެ ޕާޓީގެ ކެންޑިޑޭޓުން ކުރެއްވި ހިތްވަރާއި މަސައްކަތަށް ފައްޔާޒު ވަނީ ޝުކުރު އަދާކުރައްވާފައެވެ.
އިއްޔެ ބޭއްވި ބައި އިލެކްޝަންގައި ފަސް ގޮނޑިއާ އެކު ޕީއެންސީން ބޮޑު ކާމިޔާބީއެއް ހޯދިއިރު ގިނަ ބަޔަކު އަންނަނީ އެމްޑީޕީއަށް ވަރަށް ބޮޑަށް ފާޑުކިޔަމުންނެވެ.
