މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބޭސިކް ފަޔަރ ފައިޓަރ ކޯހުގެ ބެޗް 29 ފަށައިފިއެވެ.
އެމްއޭސީއެލް އިން ފަށާފައިވާ އެރޯޑްރޯމް ފަޔަރ ފައިޓަރ ކޯހުގައި ވައިގެ ދަތުރުފަތުރުތަކުގައި ދިމާވާ ކުއްލި ހާލަތްތަކުގައި އަމަލުކުރާނެ ގޮތުގެ ފުރިހަމަ އަދި ހަރުދަނާ ހުނަރުތައް ދަސްކޮށްދެވިގެންދާނެ ކަމަށް އެމްއޭސީއެލް އިން ހާމަކޮށްފައިވެއެވެ.
އެމްއޭސީއެލް އިން ބުނެފައިވާ ގޮތުގައި މިކޯހަކީ މޯލްޑިވްސް ސިވިލް އޭވިއޭޝަން އޮތޯރިޓީން ފާސްކޮށްފައިވާ ކޯހެކެވެ. އަދި 43 ދުވަހުގެ މިކޯހުގައި 12 ފަޔަރ ފައިޓަރ ޓްރެއިނީން ބައިވެރިވާނެ ކަމަށް ވެސް އެކުންފުނިން ބުނެފައިވެއެވެ.
މީގެއިތުރުން، މި ކޯހުން ވެލާނާ އިންޓަރނޭޝަނަލް އެއަރޕޯޓް (ވީއައިއޭ) އާއި އެ ސަރަހައްދުގައި މަތިންދާބޯޓުތަކަށާއި އިމާރާތްތަކަށް ކުރިމަތިވާ އަލިފާނުގެ ހާދިސާތަކުގައި އަމަލުކުރާނެ ގޮތާއި ވައިގެ ދަތުރުފަތުރުގެ ސަލާމަތާއި ރައްކާތެރިކަމަށް ބޭނުންވާ މުހިންމު ކަންކަން ފަޔާރ ފައިޓާޒްއަށް ދަސްކޮށްދެވިގެންދާނެ ކަމަށްވެސް އެމްއޭސީއެލް އިން ބުނެފައިވެއެވެ.
އެމްއޭސީއެލްއިން ވަނީ ވެލާނާ އިންޓަނޭޝަނަލް އެއާޕޯޓްގައި އެންމެ ޒަމާނީ ޓެކްނޮލޮޖީތަކާއެކު އާ ފަޔާ ސްޓޭޝަނެއް ހުޅުވާފައެވެ. މިއާއެކު ކުއްލި ހާލަތްތަކަށް އަވަހަށް ރެސްޕޯންސް ދިނުމަށް ފަސޭހަވެގެންދާނެ ކަމަށް އެކުންފުނިން ބުނެފައިވެއެވެ. މީގެއިތުރުން މިވަގުތު ވީއައިއޭގައި ދެ ފަޔަރ ސްޓޭޝަން ހަރަކާތްތެރިވާއިރު، ކުއްލި ހާލަތްތަކުގައި އަވަހަށް އަދި ފުރިހަމައަށް ރެސްޕޯންސް ދެވޭނެ ކަމަށް ވެސް އެމްއޭސީއެލް އިން ބުނެފައިވެއެވެ.
