އައްޑޫގައި ހިންގާ ޕޮލިސް ކޮލެޖުގައި ކާނާ ވިހަވެގެން ހާލު ސީރިއަސްވި އެކަކު ހޮސްޕިޓަލުން މިހާރު ދޫކޮށްލާފައިވާ ކަމަށް ފުލުހުން މިރޭ ބުނެފި އެވެ.
ކާނާ ވިހަވުމުގެ ސަބަބުން ހާލު ގޯސްވެ އައިސީޔޫގައި ފަރުވާދެމުންދިޔަ ހުރިހާ ކުދިން މިހާރު ހާލު ރަނގަޅުވެ، ހޮސްޕިޓަލުން ދޫކޮށްލައިފި ކަމަށް ފުލުހުން ބުނެފައިވެެއެވެ.
ފުލުހުން މިރޭ ބުނެފައިވާ ގޮތުގައި މިރޭ ހޮސްޕިޓަލުން ދޫކޮށްލާފައި ވަނީ ހާލު ސީރިއަސް ވެގެން އައިސީޔޫގައި ފަރުވާދިން ދެ ދަރިވަރުންގެ ތެރެއިން ވޯޑަށް ބަދަލުކުރި މީހާ އެވެ.
އައްޑޫގައި ހިންގާ ޕޮލިސް ކޮލެޖުގެ ތަމްރީނަށް ދިޔަ ފުލުހުންގެ ތެރެއިން 32 ދަރިވަރަކަށް ކާނާ ވިހަވުމުގެ ސަބަބުން އައްޑޫ އިކުއަޓޯރިއަލް ހޮސްޕިޓަލުގައި އެޑްމިޓްކުރެވި ފަރުވާ ދެވިފައިވާއިރު، އޭގެ ތެރެއިން ފަސް ދަރިވަރެއްގެ ހާލު ގޯސްވެގެން އައިސީޔޫގައި ވަނީ ފަރުވާދީފައެވެ.
މައުލޫމާތު ލިބޭ ގޮތުގައި އައްޑޫ ޕޮލިސް ކޮލެޖުގައި ކޭޓަރިންގެ ހިދުމަތް ދެނީ ބެސްޓް ސިލެކްޝަން ކިޔާ ކުންފުންޏަކުންނެވެ. ފުލުހުން ވަނީ މިފަދަ ކަމެއް އަލުން ހިންގާ ދިޔަ ނުދިއުމަށް އަޅަންޖެހޭ ފިޔަވަޅުތައް އަޅާނެ ކަމަށާއި މިހާދިސާ ހިންގި ސަބަބު ކަމާބެހޭ އިދާރާތަކާއި ގުޅިގެން ބަލާނެ ކަމަށް މީގެ ކުރިން ބުނެފައެވެ.
