ބަންގްލަދޭޝްއިން ރާއްޖެ އައުމަށް ބޭނުންވި ދެ ދަރިވަރަކަށް އެހީ ފޯރުކޮށްދީފައިވާކަމަށް ޚާރިޖީ ވުޒާރާއިން ބުނެފިއެވެ.
ޚާރިޖީ ވުޒާރާއިން މި ކަން ހާމަކޮށްފައިވަނީ އިއްޔެ ނެރުނު ބަޔާނެއްގައެވެ. އެ ބަޔާނުގައި ބުނެފައިވާ ގޮތުގައި ބަންގްލަދޭޝްގެ އުތުރުގެ މެޑިކަލް ސްކޫލްތަކުގައި ކިޔަވަމުންދާ ދެ ދަރިވަރަކު، އެ ސްކޫލްތައް ބަންދުކުރުމާ ގުޅިގެން އެނބުރި ރާއްޖެ އަންނަން ބޭނުންވެ، އެ ކަން އެ ވުޒާރާއަށް ވަނީ އަންގާފައެވެ. އެހެންކަމުން އެ ގައުމުގައި ހުންނަ ރާއްޖޭގެ ހައިކޮމިޝަނާއި އިންޑިއާގައި ހުންނަ ރާއްޖޭގެ ހައިކޮމިޝަނާ ގުޅިގެން އެ ދެ ދަރިވަރުންނަށް ބަހުގައި ބަންގްލަދޭޝްގެ ބޯޑަރު ހުރަސް ކުރެވޭނެ އިންތިޒާމު ހަމަޖައްސައިދިނުމަށް އެހީތެރިކަން ފޯރުކޮށްދީފައިވާނެކަމަށް އެ ބަޔާނުގައި ބުނެފައިވެއެވެ.
އެ ވުޒާރާއިން އިތުރަށް ބުނެފައިވަނީ އެ ގައުމުގައި ތިބި ދިވެހީންގެ ހާލު، ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނުން ވަރަށް ގާތުން ބަލަމުން އަންނަކަމަށެވެ.
ބަންގްލްދޭޝްގެ މަތީ ތަޢުލީމު ހާސިލު ކުރާ ދަރިވަރުން މުޒާހަރާކުރަމުން ދަނީ ސަރުކާރު ވަޒީފާތަކަށް މީހުން އައްޔަން ކުރުމުގައި އަމަލު ކުރަމުންދާ ކޯޓާ ނިޒާމާއި ސިޔާސަތުތަކާ ދެކޮޅަށް އަޑުއުފުލުމުގެ ގޮތުންނެވެ. މި ކަމާ ގުޅިގެން އެ ގައުމުގެ ސްކޫލުތައް ބަންދުކޮށް، މުޒާހަރާ ހުއްޓުވުމަށް ވަނީ ކާފިއު ވެސް އިޢުލާންކޮށްފައެވެ. މި މުޒާހަރާގައި މަރުވި މީހުންގެ އަދަދު ވަނީ 115އަށް އަރައިފައެވެ.
