އަލީ ހާޝިމް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުގެ މަގާމުން ވަކިކޮށްފިއެވެ.
ރައީސް އޮފީހުން މިއަދު ވިދާޅުވީ އަލީ ހާޝިމް އެމްއެމްއޭގެ ގަވަރުނަރުގެ މަގާމުން ވަކިކޮށްފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް، ގާނޫނު ނަންބަރު 81/6 (މޯލްޑިވްސް މަނިޓަރީ އޮތޯރިޓީގެ ގާނޫނު) ގެ ހަވަނަ މާއްދާގެ ތިންވަނަ ނަންބަރުގެ ދަށުން ރައްޔިތުން މަޖިލީހުން މަޝްވަރާދެއްވާފައިވާތީވެ ކަމަށެވެ.
އަލީ ހާޝިމް މަގާމުން ވަކިކުރުމަށް ރައީސްއަށް ލަފާއެރުވުމަށް މަޖިލިހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމު ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހުށަހަޅުއްވާ ވިދާޅުވީ އެމްއެމްއޭގެ ގާނޫނުގެ ދަށުން ގަވަރުނަރު ހާޝިމް އާ މަތިކޮށްފައިވާ މަސްއޫލިއްޔަތުތައް އަދާކުރެއްވުމުގެ ގާބިލްކަން ނެތް ކަމަށް ކޮމިޓީ އަށް ސާބިތުވާ ކަމަށެވެ. އެގޮތުން މާލީ ހާލަތު ރަނގަޅު ކުރުމަށް ދެއްވަން ޖެހޭ ލަފާ ގަވަރުނަރު ނުދެއްވާ ކަމުގައި ނާޒިމް ވިދާޅުވިއެވެ.
މާލިއްޔަތު ކޮމިޓީން ތަޅުމަށް ހުށަހެޅި ރިޕޯޓް 63 މެންބަރުންގެ އަޣުލަބިއްޔަތުން ފާސްކޮށްފައިވާއިރު، އެ ރިޕޯޓު ފާސް ކުރަން ނުފެންނަ ކަމަށް ނުވަ މެމްބަރުން ވަނީ ވޯޓު ދެއްވައިފައެވެ.
މާލިއްޔަތު ކޮމިޓީން ހާޝިމް އެމްއެމްއޭގެ ގަވަރުނަރުގެ މަގާމުން ވަކިކުރުމަށް ނިންމުމުގެ ކުރިން އޭނާ އަށް ޖަވާބުދާރީވާން ތިން ފުރުސަތު ވަނީ ދީފައެވެ، އެހެންނަމަވެސް ތިން ކޮމިޓީން ދިން ތިން ފުރުސަތުގައި ވެސް އާލާސްކަންފުޅާ އުޅުއްވާކަމަށް ވިދާޅުވެ ހާޝިމް ވަނީ ކޮމިޓީއަށް އައުމަށް އުޒުރުވެރިވެފައެވެ.
