ކުރީ ސަރުކާރުން ފެށި ބިންވެރިޔާ ސްކީމްގެ ދަށުން މިހާތަނަށް ހުޅުމާލެއިން 624 ގޯތި ދޫކޮށްފައިވާ ކަމަށް ހައުސިން މިނިސްޓްރީން ބުނެފިއެވެ.
ހައުސިން މިނިސްޓްރީން މިއަދު އެކްސްގައި ބިންވެރިޔާ ސްކީމްގެ ދަށުން ހުޅުމާލެއިން ބިން ދޫކޮށްފައިވާ އަދަދުތައް ހާމަކޮށް ކުރި ޕޯސްޓެއްގައި ބުނެފައިވަނީ މިއަދު ދޫކުރި 18 ގޯއްޗާ އެކު މިހާތަނަށް ހުޅުމާލެއިން 624 ގޯތި ދޫކޮށްފައިވާ ކަމަށެވެ.
ހައުސިން މިނިސްޓްރީން ހާމަކޮށްފައިވާ ގޮތުގައި މިދިޔަ ސަރުކާރުން ހުޅުމާލެއިން 1408 ގޯތި ދޫކުރުމަށް ނިންމާފައިވާއިރު، މިދިޔަ އަހަރު 465 ގޯތި އަދި މިއަހަރު މިހާތަނަށް 159 ގޯތި ވަނީ ދޫކޮށްފައެވެ. އެހެންކަމުން ޖުމްލަ މީހަތަނަށް 624 ގޯތި ވަނީ ހުޅުމާލެއިން ދޫކޮށްފައެވެ.
ބިންވެރިޔާ ސްކީމްގެ ދަށުން މިއަދު ވަނީ 18 ގޯއްޗެއް އެ ގޯތީގެ ވެރިފަރާތާއި ހަވާލުކުރެވިފައި ، އަދާހަމައަށް ޖުމުލަ 624 ގޯއްޗެއް ވަނީ ހަވާލުކުރެވިފައި. pic.twitter.com/zaU7OyO0Zw
— Ministry of Housing, Land and Urban Development (@MHLUDmv) July 22, 2024
މިދިޔަ ސަރުކާރުން މާލޭގެ ރައްޔިތުންނަށް ގޯތި ދިނުމަށް ހުޅުވާލާފައިވާ ބިންވެރިޔާ ސްކީމްގެ ދަށުން ގޯތި ދިނުން ލަސްވުމުގެ ސަބަބުން މާލޭގެ ރައްޔިތުން ވަނީ މިދިޔަ ބުރާސްފަތި ދުވަހުގެ ރޭވެސް މުޒާހަރާ ކޮށްފައެވެ.
ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން ގޯއްޗަށް ޝަރުތު ހަމަވާ 18،955 މީހުންގެ ތެރެއިން 9،003 ގޯތި ދޫކުރުމަށް ނިންމާފައިވާއިރު، އެ ގޯތިތައް ދޫކުރަން ހަމަޖެހިފައިވަނީ ހުޅުމާލެއާއި ގުޅީފަޅު އަދި ގިރާވަރުފަޅުންނެވެ.
ބިންވެރިޔާ ސްކީމް އާއިއެކު ހުޅުވާލި ގެދޮރުވެރިޔާ ސްކީމްގެ ދަށުން ފްލެޓަށް އެދި ފޯމު ހުށަހެޅި މީހުންގެ ފޯމުތައް ބާޠިލުކުރުމަށް މިސަރުކާރުން ނިންމާފައިވާ ކަމަށް ސޯޝަލް މީޑިއާގައި ވާހަކަދެކެވޭއިރު، ގިނަ ބަޔަކު ދަނީ މިކަމަށްވެސް ފާޑުކިޔަމުންނެވެ.