އެއް ކިލޯއަށް ވުރެ ގިނަ އަދަދެއްގެ މަސްތުވާ ތަކެއްޗާއެކު 3 މީހުން ހައްޔަރުކޮށްފިއެވެ.
ފުލުހުން ވިދާޅުވީ މަސްތުވާތަކެތި ޓްރެފިކް ކުރުމުގެ މައްސަލެއްގައި މަސްތުވާތަކެތީގެ ވިޔަފާރިކުރުމަށް ބޭނުންކުރަމުންދާ ތަންތަން ބަލައި ފާސްކޮށް 1 ކިލޯއަށް ވުރެ ގިނަ އަދަދެއްގެ މަސްތުވާ ތަކެއްޗާއެކު 3 ދިވެހި ފިރިހެނުން ހައްޔަރުކޮށްފައިކަމަށެވެ.
އެގޮތުން އެތަނުން ފެނުނު މަސްތުވާތަކެތީގެ ބަރުދަނުގައި 1254.54 ގްރާމް ހުރިކަމަށް ފުލުހުން ވަނީ ވިދާޅުވެފައެވެ.
އެގޮތުން ހައްޔަރުކޮށްފައިވަނީ އުމުރުން 44 އަހަރުގެ ފިރިހެނަކާއި، 36 އަހަރުގެ ފިރިހެނަކާއި އަދި 4 އަހަރުގެ ފިރިހެނެއް ކަމަށްވެސް ފުލުހުން ވިދާޅުވެއެވެ.
މި ތިން މީހުންގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 44 އަހަރުގެ މީހާގެ ބަންދަށް 20 ދުވަސް ޖެހި އިރު، 36 އަހަރުގެ މީހާއާއި 54 އަހަރުގެ މީހާގެ ބަންދަށް ވަނީ 7 ދުވަސް ޖަހައިފައެވެ.
މި މީހުންގެ ބަންދު އަމުރުގައި ބުނެފައިވާގޮތުން ތުހުމަތު ކުރެވޭ ކޮންމެސް މިންވަރަށް ހެކި ގަރީނާ ހުށަހަޅާފައިވާކަމަށާއި އޭގެ ތެރޭގައި އިންޓެލިޖެންސް ރިޕޯޓާއި، ސީނަށް ދިޔަ ފުލުހެއްގެ ބަޔާނާއި ސީންގެ މަންޒަރު ފެންނަ ފޮޓޯ ހިމެނެއެވެ.
