ބިންވެރިޔާ ސްކީމްގެ ދަށުން ހުޅުމާލެ އިން ހިލޭ ދޫކުރި ގޯތިތަކުގެ ސަބަބުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ލިބުނު މާލީ ގެއްލުން ބެލުމަށް ހާއްސަ އޮޑިޓެއް ހެދުމަށް އޮޑިޓާ ޖެނެރަލްގެ އޮފީހަށް އަންގަން ރައްޔިތުންގެ މަޖިލީހުގެ މާލިއްޔަތު ކޮމެޓީން މިއަދު ނިންމައިފިއެވެ.
ކުރީގެ ރައީސް އިބްރާހިމް މުޙައްމަދު ސޯލިޙްގެ ވެރިކަމުގައި ކުރިއަށް ގެންގޮސްފައިވާ ބިންވެރިޔާ ސްކީމްގެ ދަށުން، އެޗްޑީސީއަށް ލިބުނު ގެއްލުން ހޯދުމަށް އޮޑިޓް ހެދުމަށް އޭޖީ އޮފީހުގައި އެދެން ހުށަހަޅާފައި ވަނީ ފުވައްމުލަކު އުތުރު ދާއިރާގެ ޕީއެންސީ މެންބަރު ހަމަދު އަބްދުﷲއެވެ. ކޮމިޓީގެ ބައްދަލުވުމުގައި ހާޒިރުވެތިބި ހުރިހާ މެންބަރުންގެ އިއްތިފާގުން މިހުށަހެޅުން ވަނީ ފާސްވެފައެވެ.
މިއަދު މާލިއްޔަތު ކޮމިޓީން ފާސްކޮށްފައިވާ މައްސަލައިގައި ވަނީ މާޗް 2019 އިން ފެށިގެން ނޮވެމްބަރު 17، 2023 ގެ ނިޔަލަށް ހިންގި ގޯއްޗާ ގުޅޭ މުއާމަލާތައް ބެލުމަށް އެސްޑީއެފްސީގެ ހާއްސަ އޮޑިޓެއް ހެދުމަށާއި ބިންވެރިޔާ ސްކީމްގެ ދަށުން ދިން ގޯތިތަކާ ގުޅިގެން އެޗްޑީސީ އަށް އެއްވެސް ބަދަލެއް ދޭން ޖެހޭތޯ ބެލުމަށެވެ.
ހަމަދު ވިދާޅުވިގޮތުގައި، މިއޮޑިޓް ހެދަނީ އެއްވެސް މީހެއްގެ އަތުން ގޯތި އަތުލުމަށް ނޫން ކަމަށެވެ.
“ސަރުކާރުތަކުން ސިޔާސީ ބޭނުމަށް މި ފަދަ ކަންކަން ކުރާ އިރު ކުންފުނިތަކަށް މާލީ ގެއްލުމާ އެއްޗެހި ލިބިފައިވަނީ ކިހާވަރަކަށް ކަން ބަލަން ޖެހޭ،” ހަމަދު ވިދާޅުވިއެވެ.
ބިންވެރިޔާ ސްކީމްގެ ފުރަތަމަ ފިޔަވަހީގެ ގޯއްޗަށް 18،955 މީހުން ޝަރުތު ހަމަވާއިރު 9000 ގޯތި ދިނުމަށް ވަނީ ނިންމާފައެވެ. އެގޮތުން ހުޅުމާލެ ފޭސް 2 އިން ދިނުމަށް ހަމަޖެހިފައިވަ 1،408 ގޯތީގެ ތެރެއިން 624 ގޯތި ވަނީ މިހާރު ހަވާލުކޮށްފައެވެ.
