މި ސަރުކާރުން ވުޒާރާތަކާ އެވުޒާރާތަކުގެ މަސައްކަތްތަކަށް ގެނައި ބަދަލުތައް ރައްޔިތުންގެ މަޖިލީހުން ފާސްކޮށްފިއެވެ.
ކުރީގެ ރައީސް އިބްރާޙިމް މުޙައްމަދު ސޯލިޙްގެ ސަރުކާރުން 18 މިނިސްޓްރީ އެކުލަވާލާފައިވާ އިރު، ރައީސް ސޯލިޙްގެ ސަރުކާރުން ވުޒާރާތަށް އެކުލަވާފައިވާ ގޮތަށް ބަދަލު ގެނެސް މިސަރުކާރުން ވަނީ 22 މިނިސްޓްރީއެއް އެކުލަވައިލާ، އޭގެ ތެރެއިން ބައެއް މިނިސްޓްރީތަކުގެ މަސްއޫލިއްޔަތުތަކާއި ޒިންމާތަކަށް ބަދަލު ގެނެސްފައެވެ.
މިސަރުކާރުން ވެރިކަމަށް އައުމަށްފަހު ވުޒާރާތަކަށާއި ވުޒާރާތަކުގެ މަސްއޫލިއްޔަތުތަކަށް އައި ބަދަލުތައް ފާސްކުރުމަށް ހުސްވި އަހަރުގެ ޑިސެމްބަރު މަހުގެ ތެރޭގައި ފޮނުވާފައިވާއިރު، ގާނޫނުގައި ކަނޑައަޅާފައިވާ ގޮތުން މިފަދައިން ވުޒާރާތަކަށް ގެންނަ ބަދަލު ރައްޔިތުންގެ މަޖިލީހުން ފާސްކުރަން ޖެހެއެވެ.
ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން މިމައްސަލަ ދިރާސާ ކުރުމަށްފަހު ކޮމިޓީގެ މެންބަރުންގެ އިއްތިފާގުން ފާސްކުރުމަށް ފަހު މިއަދުގެ މަޖިލީހުގެ ޖަލްސާއަށް ވަނީ ރިޕޯޓު ހުށަހަޅާފައެވެ.
މިއަދު ރައްޔިތުންގެ މަޖިލީހުގައި ވުޒާރާތަކާއި އެ ވުޒާރާތަކުގެ މަސްއޫލިއްޔަތުތައް ފާސްކޮށްފައި ވަނީ ސަރުކާރުގެ މެންބަރުންގެ އަޣުލަބިއްޔަތު އޮތް މަޖިލީހުގެ 71 މެންބަރުންގެ ވޯޓާއެކުގައެވެ.
މިސަރުކާރުން ވުޒާރާތަކަށް ގެނައި ބަދަލުތަކުގެ ތެރޭގައި މީގެ ކުރިން އެއް މިނިސްޓްރީއެއްގެ ގޮތުގައި އޮތް ބައެއް މިނިސްޓްރީތައް ވަނީ ދެ މިނިސްޓްރީއަކަށް ބަދަލުކޮށް މަސްއޫލިއްޔަތުތައް ފުޅާކޮށްފައެވެ.
އެގޮތުން ވަކިކުރި މިނިސްޓްރީތަކުގެ ތެރޭގައި ޔޫތު މިނިސްޓްރީ، ސްޕޯޓްސް މިނިސްޓްރީ، ފިޝަރީޒް މިނިސްޓްރީ، އެގްރިކަލްޗާ މިނިސްޓްރީ، ޕްލޭނިން މިނިސްޓްރީ އަދި އިންފްރާސްޓްރަކްޗާ މިނިސްޓްރީ ހިމެނެއެވެ.
