ދާދި ފަހުން އެމެރިކާގެ ކުރީގެ ރައީސް ޑޮނަލްޑް ޓްރަމްޕް ޒަހަމްކޮށްލުމާ ގުޅިގެން އެކަށީގެން ފިޔަވަޅުތަކެއް އެޅިފައި ނެތްކަމަށް ގަބޫލުކުރައްވައި، އެ ގައުމުގެ ސިޔާސީ އިސް ފަރާތްތައް ހިމާޔަތް ކުރުމުގެ ޒިންމާ އޮންނަ ސީކްރެޓް ސާވިސް ހިދުމަތުގެ ޑިރެކްޓަރގެ މަގާމު ފުރުއްވި ކިމްބާލީ ޗީޓްލް އިސްތިއުފާ ދެއްވައިފިއެވެ.
ޗީޓްލް އިސްތިއުފާ ދެއްވައި އެ ކަން ސީކްރެޓް ސާވިސްގެ މުވައްޒަފުންނަށް އަންގަވާފައިވަނީ އީމެއިލް މެދުވެރިކޮށް މިދިޔަ ހޯމަ ދުވަހުއެވެ. އެ އީމެއިލްގައިވާ މައުލޫމާތު އާންމުކޮށް އެސޯސިއޭޓެޑް ޕްރެސް ނޫހުގައި ބުނެފައިވާ ގޮތުގައި އެ މައްސަލައިގައި ސެކިއުރިޓީ ބެލެހެއްޓުމުގައި ފެއިލްވެފައިވާކަމަށް އަމިއްލަފުޅަށް ގަބޫލުކުރައްވާކަމަށް ޗީޓްލް ވިދާޅުވެފައިވެއެވެ.
ޗީޓްލް އިސްތިއުފާ ދެއްވާފައި މި ވަނީ އެމެރިކާގެ ގާނޫނު ހަދާ މަޖިލީހުގެ މެންބަރުން އޭނާގެ ގާބިލުކަމާ މެދު ސުވާލު އުފައްދާ، އޭނާގެ އިސްތިއުފާއަށް ގޮވާލަމުން ދިޔަ ދަނޑިވަޅެއްގައެވެ. އެ މަޖިލީހުގެ އޯވާސައިޓް ކޮމިޓީއިން މި ހަފްތާގެ ހޯމަ ދުވަހު ވަނީ ޗީޓްލް ހާޒިރުކޮށް ޓްރަމްޕްގެ ރެލީގައި އެޅި ފިޔަވަޅުތަކާ ގުޅޭ ގޮތުން ސުވާލު ވެސް ކޮށްފައެވެ. އެ ކޮމިޓީގެ ސުވާލުތަކަށް ޖަވާބު އަރުވަމުން ވެސް ޗީޓްލް ވަނީ މި ހަމަލާއާ ގުޅިގެން ސީކްރެޓް ސާވިސް ފެއިލްވެފައިވާކަމަށް ގަބޫލުކުރައްވާކަމަށް ވިދާޅުވެފައެވެ.
ޗީޓްލްގެ އިސްތިއުފާއާ ގުޅިގެން އެމެރިކާގެ ރައީސް ޖޯ ބައިޑެން ވަނީ ޗީޓްލްގެ ޚިދުމަތަށް ޝުކުރު އަދާކުރައްވާފައެވެ.
ކުރީގެ ރައީސް ޑޮނަލްޑް ޓްރަމްޕް އަވަހާރަ ކޮށްލަން ބަޑިން ޙަމަލާ ދިނީ މި މަހުގެ 13 ވަނަ ދުވަހެވެ. މި ޙަމަލާ ދީފައި ވަނީ ޕެންސިލްވޭނިޔާ ސްޓޭޓްގެ ރަށެއްކަމަށްވާ ބަޓްލަރގައި ބޭއްވި ކެމްޕޭން ޖަލްސާއެއްގައި ވާހަކަފުޅު ދައްކަވަން ހުއްޓައެވެ. އެ ހަމަލާ ދިން 20 އަހަރުގެ ޒުވާނާ، ހަމަލާ ދިން ވަގުތު ސީކްރެޓް ސާވިސްއިން ވަނީ ބަޑި ޖަހައި މަރައިލައިފައެވެ.
