މޯލްޑިވްސް މަނިޓަރީ އޮތޯރިޓީއަށް ގަވަރުނަރަކު އައްޔަން ކުރެވެންދެން ގަވަރުނަރުގެ މަގާމުގެ މަސްއޫލިއްޔަތުތައް ޑެޕިއުޓީ ގަވަރުނަރު އަހްމަދު އިމާދު އާއި ހަވާލުކޮށްފިއެވެ.
ކުރިން އެމްއެމްއޭގެ ގަވަރުނަރުގެ މަގާމުގައި ހުންނެވި އަލީ ހައިޝަމް ގަވަރުނަރުގެ މަގާމުން އިއްޔެ ވަކިކުރުމުން އެމަގާމަށް މީހަކު އައްޔަން ކުރެވެންދެން މިހާރު ޑެޕިއުޓީ ގަވަރުނަރުގެ މަގާމުގައި ހުންނެވި އަހްމަދު އިމާދަށް އެމަގާމުގެ މަސްއޫލިއްޔަތުތައް ހަވާލުކޮށްފައިވާ ކަމަށެވެ.
އެމްއެމްއޭއިން ވަނީ އަލީ ހައިޝަމް ގަވަރުނަރުކަން އަދާކުރެއްވި ދައުރުގައި އެ އޮތޯރިޓީއަށް ކޮށްދެއްވި އަގުހުރި ހިދުމަތްތަކަށް ޝުކުރު އަދާކޮށްފައެވެ.
މިދިޔަ ބުދަ ދުވަހު ބޭއްވި މާލިއްޔަތު ކޮމިޓީގެ ބައްދަލުވުމުގައި އެމްއެމްއޭގެ ގަވަރުނަރުގެ މަގާމުގައި ހުންނެވި އަލީ ހާޝިމް އެމަގާމުގެ މަސްއޫލިއްޔަތު އަދާކުރުމުގެ ގާބިލުކަން ނެތް ކަމަށް ބުނެ، އޭނާ އެ މަގާމުން ވަކިކުރުމަށް ރައީސަށް ލަފާދޭން ފެންނަ ކަމަށް ހުށަހެޅުއްވީ ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމެވެ.
މާލިއްޔަތު ކޮމިޓީން ހާޝިމް ވަކިކުރުމަށް ރައީސަށް ލަފާއެރުވުމާ ބެހޭ މައްސަލަ ފާސްކުރުމަށްފަހު، ރައްޔިތުންގެ މަޖިލީހުގެ ތަޅުމުގައި އެރިޕޯޓް ފާސްކުރުމަށް ފެނޭތޯ އެހުމުން، ވޯޓުގައި ބައިވެރިވެވަޑައިގެންނެވި 72 މެންބަރުންގެ ތެރެއިން 63 މެންބަރުން ވަނީ ހާޝިމް ވަކިކުރަން ރައީސަށް ލަފާދޭން ފެންނަ ކަމަށް ވޯޓް ދެއްވާފައެވެ.
އެހެންކަމުން އެމްއެމްއޭގެ ގަވަރުނަރުގެ މަގާމުން ހާޝިމް ވަކިކޮށްފައިވާއިރު، ގަވަރުނަރުގެ މަގާމު މިވަގުތު ވަނީ ހުސްވެފައެވެ. އަދި މިމަގާމަށް ފިނޭންސް މިނިސްޓަރުގެ އެޑްވައިޒަރުގެ މަގާމުގައި މިނިސްޓަރެއްގެ ފެންވަރުގައި އައްޔަނުކޮށްފައިވާ އަހްމަދު މުނައްވަރު ހަމަޖެއްސުމަށް ރައްޔިތުންގެ މަޖިލީހުގެ ލަފާ ހޯދުމަށް ފޮނުވުމަށް ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށް ރައީސް އޮފީހުން ވަނީ ހާމަކޮށްފައެވެ.
