ސަރުކާރު ކުންފުނިތަކުގެ މައްޗަށް މައުލޫމާތު ހޯދައި ލިބިގަތުމުގެ ހައްގުގެ ގާނޫނު ހިންގޭނެ ގޮތަށް އޮތް މާއްދާ ބާޠިލް ނުކުރެވޭނެ ކަމަށް ސުޕްރީމް ކޯޓުން ވެސް މިއަދު ހުކުމްކޮށްފި އެވެ.
މައުލޫމާތު ހޯދާ ލިބިގަތުމުގެ ގާނޫނުގައި ސަރުކާރުގެ ކުންފުނި ތަކުގެ މައްޗަށް އެގާނޫނުގައި ކަނޑައަޅާފައިވާ އުސޫލުތައް ހިނގާނެ ކަމަށް ސީދާ ޞަރީހާ އިބާރާތުން ބަޔާންކޮށްފައި ނުވާ ނަމަވެސް އެގާނޫނުން ބާރު ލިބިގެން އިންފޮމޭޝަން ކޮމިޝަނަރު އެކުލަވާލާފައިވާ މައުލޫމާތު ހޯދައި ލިބިގަތުމުގެ ގަވާއިދުގައި ސަރުކާރު ކުންފުނިތަކުގެ މައްޗަށް އެ ގާނޫނުގެ އުސޫލު ހިނގާނެ ކަމަށް ބަޔާން ކޮށްފައި އޮވެއެވެ.
އިންފޮމޭޝަން ކޮމިޝަނަރު އެކުލަވާލާފައިވާ މައުލޫމާތު ހޯދައި ލިބިގަތުމުގެ ގަވާއިދުގައި ކަނޑައަޅާފައިވާ މިމައްދާ އަކީ ގާނޫނާ ހިލާފު މާއްދާއެއް ކަމަށް ބުނެ އެމާއްދާ ބާޠިލް ކުރުމަށް އެމްޓީސީސީ އިން ކޮށްފައިވާ ދަޢުވާއަށް ޙުކުމް ކުރައްވަމުން ހައިކޯޓުން ނިންމާފައި ވަނީ ގަވާއިދުގެ އެ ބައި ގާނޫނާ ހިލާފު ނޫން ކަމަށެވެ.
އެއަށްފަހު އެމްޓީސީސީ އިން ވަނީ ހައިކޯޓުގެ ނިންމުން ސުޕްރީމް ކޯޓުގައި އިސްތިޢުނާފު ކޮށްފައެވެ. ސުޕްރީމް ކޯޓުން މިމައްސަލައިގައި ޙުކުމް ކުރައްވަމުން ވިދާޅުވެފައި ވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައި ދައުލަތުން އެހީ ލިބިގެންވާ ފަރާތްތަކުގެ މައްޗަށް އެ ގާނޫނުގެ އުސޫލުތައް ހިނގާނެ ކަމަށް ގާނޫނުގައި ބުނެފައިވާތީ، އެކަން އިތުރަށް ތަފުސީލުކޮށް ދިނުމަށް ގަވާއިދުގައި އެފަދަ މާއްދާއެއް ހިމެނުމުގެ ބާރު އިންފޮމޭޝަން ކޮމިޝަނަރަށް އޮންނާނެ ކަމަށެވެ. އަދި އެހެންކަމުން ގަވާއިދުގައި އެގޮތަށް ހިމެނުމަކީ ގާނޫނާ ހިލާފު ކަމެއް ކަމަށް ނުބެލެވޭ ކަމަށެވެ.
އެހެންނަމަވެސް ސަރުކާރުގެ އެކި ކުންފުނިތަކުގައި ސަރުކާރުގެ ކޮންޓްރޯލް އޮންނަ މިންވަރު ތަފާތުވުމުގެ ސަބަބުން ސަރުކާރު ކުންފުނިތަކުގެ މައްޗަށް އެ ގާނޫނުގެ އުސޫލު ހިނގާނެތޯ ބެލުމުގައި ސަރުކާރުގެ ކޮންޓްރޯލް އެ ކުންފުންޏެއްގެ މައްޗަށް އޮންނަ މިންވަރެއްގެ މައްޗަށް ރިއާޔަތް ކުރެވޭނެ ކަމަށް ފަނޑިޔާރު ހުސްނުއްސުއޫދު ލިޔުއްވައި، ފަސް ފަނޑިޔާރުންގެ އިއްތިފާގުން ކުރެއްވި ހުކުމުގައި ބަޔާންކޮށްފައިވެއެވެ.
މިކަންކަމުގެ މައްޗަށް ރިއާޔަތް ކުރުމަށްފަހު ވެސް ހައި ކޯޓުގެ ނިންމުމަށް ބަދަލު ގެންނަންޖެހޭ ސަބަބެއް ނެތް ކަމަށް ސުޕްރީމް ކޯޓުން ވަނީ ޙުކުމް ކޮށްފައެވެ.
