ޕްރޮގްރާމް އެކްރެޑިޓޭޝަން ގަވާއިދާ ހިލާފަށް ކޯސް ހިންގާތީ މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން އެވިޑް ކޮލެޖާއި ކްލިކް ކޮލެޖް ޖޫރިމަނާކޮށްފިއެވެ.

އެ ދެ ކޮލެޖާ މެދު އެމްކިއުއޭއިން ފިޔަވަޅު އަޅާފައިވަނީ ދެ ކޮލެޖުގައި ހިންގާ ކޯސްތަކާ ގުޅޭގޮތުން ލިބުނު ޝަކުވާތަކެއް ބެލުމަށްފަހު، ޕްރޮގްރާމް އެކްރެޑިޓޭޝަން ގަވާއިދުގެ ދަށުންކަމަށް އެމްކިއުއޭއިން ހާމަކޮށްފައިވެއެވެ. އެ ކަން ހާމަކޮށް އެމްކިއުއޭއިން މިދިޔަ ހޮނިހިރު ދުވަހުގެ ރޭ ވަނީ ގެޒެޓުގައި އިއުލާނެއް އާންމުކޮށްފައެވެ.

ކޮވިޑް-19އާ ގުޅިގެން ރާއްޖޭގެ މަތީ ތަޢުލީމު ދޭ ހުރިހާ މަރުކަޒުތަކަށް އީ ލާނިން ޑެލިވަރީ މޮޑަލިޓީއަށް ޕްރޮގްރާމްތައް ހިންގުމުގެ އާއްމު ހުއްދައެއް އެމްކިއުއޭއިން ދޫކުރިއެވެ. ނަމަވެސް އާއްމު ހާލަތަކަށް އައުމާ އެކު އެ ހުއްދަ ވަނީ ބާތިލުކުރެވިފައެވެ.

އެމްކިއުއޭގެ ހުއްދަ ބާތިލު ކުރި ފަހުން އީ ލާނިން ޑެލިވަރީ މޮޑަލިޓީއަށް ކްލިކް ކޮލެޖުން ކޯސް ހިންގާފައިވަނީ އެމްކިއުއޭގެ ހުއްދަ ނުހޯދައިކަމަށްވާތީ އެ ކޮލެޖާ ދެކޮޅަށް ފިޔަވަޅު އެޅިކަމަށް އެމްކިއުއޭއިން ބުނެފައިވެއެވެ. ކްލިކް ކޮލެޖުގެ “ބެޗްލާ އޮފް ބިޒްނަސް މެނޭޖްމަންޓް” ޕްރޮގްރާމް ހިންގުމަށް އެމްކިއުއޭއިން ހުއްދަ ދޫކޮށްފައިވަނީ ފޭސް ޓު ފޭސްކޮށެވެ. ނަމަވެސް މި ޕްރޮގްރާމް ކްލިކް ކޮލެޖުން އިސްތިހާރުކޮށް ހިންގަނީ އީ ލާނިން ޑެލިވަރީ މޮޑަލިޓީއަށެވެ. ކްލިކް ކޮލެޖްގެ އިންސްޓަގްރާމް ޕޭޖުންނާއި ކްލިކް ކޮލެޖްގެ ވެބްސައިޓުން ވެސް މި ޕްރޮގްރާމްތައް އީ ލާނިން ޑެލިވަރީ މޮޑަލިޓީގެ ދަށުން ހިންގުމަށް އިސްތިހާރު ކޮށްފައިވާކަން އެނގެން އެބަ ހުއްޓެވެ. މި ކަމާ ގުޅިގެން ބައެއް ދަރިވަރުން އެމްކިއުއޭއަށް ޝަކުވާ ހުށަހެޅިކަމަށް އެމްކިއުއޭއިން ބުނެއެވެ.

ކްލިކް ކޮލެޖާ މެދު އަޅާފައިވާ ބައެއް ފިޔަވަޅުތައް:

1. ރާއްޖޭގެ ގައުމީ ސަނަދުތަކުގެ އޮނިގަނޑާ ހިލާފަށް އަދި ޕްރޮގްރާމް އެކްރެޑިޓޭޝަނާ ހިލާފަށް ހިންގާ ކަންކަން ރަނގަޅު ކުރުމަށް އެންގުން.
2. އެކްރެޑިޓްނުކޮށް މަތީ ތައުލީމުގެ ޕްރޮގްރާމްތައް ހިންގާތީ 10،000ރ.އިން ޖޫރިމަނާ ކުރުން.
3. އީ ލާނިން ޑެލިވަރީ މޮޑަލިޓީއަށް ކުރިއަށްގެންދިޔަ ޕްރޮގްރާމްތައް ހުއްޓާލަން އެންގުން
4. ސަނަދު ދިނުމުގެ ހުއްދަ ދޫނުކުރަން ނިންމުން

އެކްރެޑިޓޭޝަން ހުއްދައާ ނުލައި ހިންގާފައިވާ ހުރިހާ ޕްރޮގްރާމަކަށް ވެސް ފިޔަވަޅުތައް އަޅާނެކަމަށާއި އެ ޕްރޮގްރާމްތަކުގައި ކިޔަވާ ދަރިވަރުންނަށް ލިބޭ ގެއްލުމުގެ ޒިންމާ އުފުލަން ޖެހޭނީ ކްލިކް ކޮލެޖުންކަމަށް ވެސް އެމްކިއުއޭއިން ބުނެފައިވެއެވެ.

އެވިޑް ކޮލެޖާ ބެހޭ ގޮތުން މައިގަނޑު ގޮތެއްގައި ހުށަހެޅި ޝަކުވާއަކީ ލެކްޗަރާއިންނަށް ދޭން ޖެހޭ މުސާރަ ނުދީ ހުރުމުގެ ސަބަބުން ދަރިވަރުންގެ އިމްތިހާން ކަރުދާސްތައް ބައެއް ލެކްޗަރާއިން މާކު ނުކުރުމެވެ. އޭގެ ސަބަބުން ޕްރޮގްރާމްގެ މުއްދަތު އިތުރުވެ، އެ މުއްދަތަށް ދަރިވަރުންނަށް އިތުރަށް ފައިސާ ދައްކަން ޖެހުމުގެ ޝަކުވާ ހިމެނެއެވެ. އެ ޝަކުވާއާ ގުޅިގެން އެމްކިއުއޭއިން އެވިޑް ކޮލެޖުގެ 7 ޕްރޮގްރާމެއްގެ ‘ރެންޑަމް ބެޗް އޮޑިޓް’އެއް ކުރިއަށް ގެންދިއުމުން އެކްރެޑިޓޭޝަން ގަވާއިދާއި ގައިޑްލައިނާ ހިލާފަށް ގިނަ ކަންތައްތަކެއް އެވިޑް ކޮލެޖުން ކޮށްފައިވާކަން ފާހަގަ ކުރެވިފައިވާކަމަށް އެމްކިއުއޭއިން ބުންޏެވެ.

އެވިޑް ކޮލެޖަށް އަޅާފައިވާ ބައެއް ފިޔަވަޅުތައް:

1 –  ގައުމީ ސަނަދުތަކުގެ އޮނިގަނޑާ ހިލާފަށް އަދި ޕްރޮގްރާމް އެކްރެޑިޓޭޝަނާ ހިލާފަށް ހިންގާ ކަންކަން ރަނގަޅު ކުރުމަށް އެންގުމް

2 – އިތުރު ޕްރޮގްރާމަކަށް އެކްރެޑިޓޭޝަނާއި ހިންގުމުގެ ހުއްދަ ދޫ ނުކުރަން ނިންމުން

3 – އެވިޑް ކޮލެޖުން ޕްރޮގްރާމް ހިންގަނީ ދިވެހިރާއްޖޭގެ ގައުމީ ސަނަދުތަކުގެ އޮނިގަނޑާއި ޕްރޮގްރާމް އެކްރެޑިޓޭޝަންގެ މިންގަނޑުތަކާ ހިލާފަށްކަން އާންމުކޮށް އިއުލާން ކުރަން ނިންމުން

އެމްކިއުއޭއިން ބުނެފައިވާ ގޮތުގައި އެކްރެޑިޓް ނުކުރާ ޕްރޮގްރާމަކުން ޙާސިލު ކުރާ ސަނަދެއް އެ އަތޯރިޓީއިން ގަބޫލެއް ނުކުރާނެއެވެ. އަދި އެ ކަމުގެ ޒިންމާ އެ އޮތޯރިޓީން ނުނަގާނެއެވެ. ހަމައެހެންމެ “ޕްރޮގްރާމް އެކްރެޑިޓޭޝަން ގަވާއިދު” ގެ 30 ވަނަ ބާބުގެ ދަށުން އެ ފަދަ މަރުކަޒަކާ މެދު ފިޔަވަޅު އެޅޭނެކަމަށް ވެސް މި މަހުގެ 17 ވަނަ ދުވަހު އެ އޮތޯރިޓީން ނެރުނު ބަޔާނުގައި ބުނެފައިވެއެވެ.