ފާއިތުވި ސަރުކާރުން އިފްތިތާޙްކޮށް ފެށި ގެދޮރުވެރިޔާ މަޝްރޫޢުގެ ދަށުން ފްލެޓް ލިބޭނެކަމަށް ކަނޑައަޅައި އެކުލަވާލި ލިސްޓް މި ސަރުކާރުން މުރާޖައާ ކުރުމަށްފަހު އޮކްޓޫބަރު މަހު ޢާންމުކުރާނެ ކަމަށް ހައުސިން މިނިސްޓަރު ޑރ. އަލީ ހައިދަރު އަހްމަދު ވިދާޅުވެއްޖެއެވެ.
ރައީސް އިބްރާހީމް މުހައްމަދު ޞާލިޙްގެ ސަރުކާރުން އެކުލަވާލި މި ލިސްޓް ބާޠިލް ނުކުރުމަށް ގޮވާލައި ރައްޔިތުންގެ މަޖިލިހަށް ހުށަހަޅައިފައިވާ ޕެޓީޝަނާއި ގުޅިގެން ރައްޔިތުންގެ މަޖިލިހުގެ ޕެޓީޝަން ކޮމެޓީއަށް ހާޒިރުކޮށް ކުރެއްވި ސުވާލުތަކަށް ޖަވާބުދެއްވަމުން ވަޒީރު ވިދާޅުވީ، ކުރީގެ ލިސްޓް ބާޠިލްކުރުމުގެ އެއްވެސް ވިސްނުމެއް ސަރުކާރުގެ ނެތްކަމުގައެވެ.
އެހެން ނަމަވެސް، އެ ލިސްޓް މުރާޖަޢާކޮށް ފްލެޓްތައް ދީފައިވަނީ ޝަރުތު ހަމަވާ އޭގެ ޙައްޤުވެރިންނަށްކަން ޔަގީން ކުރާނެ ކަމުގައި ވަޒީރު ވިދާޅުވިއެވެ.
އެގޮތުން ގެދޮރުވެރިޔާ ސްކީމުގެ ދަށުން ދޫކުރާ ފްލެޓްތަކުގެ މަސައްކަތް އެއްކޮށް ނިމެންވާއިރަށް މި ސަރުކާރުން ފްލެޓް ލިސްޓްތައް މުރާޖައާކޮށް ނިންމައި އާންމުކުރާނެކަމުގައިވެސް ވަޒީރު ވިދާޅުވިއެވެ.
މީގެ އިތުރުން މި ސްކީމުގެ ދަށުން އިމާރާތް ކުރުމަށް ހަމަޖެހިފައިވާ 32 ފްލެޓްގެ ތެރެއިން ފުރަތަމަ 6 ފްލެޓްގެ މަސައްކަތް އަންނަ އޮކްޓޫބަރުމަހަށް ނިންމާލެވޭނެކަން ފާހަގަކުރައްވައި ވަޒީރު ވިދާޅުވީ، އެހާތަނަށް ސަރުކާރުން އެ ފްލެޓްތަކުގެ ލިސްޓްވެސް މުރާޖަޢާކޮށް ނިންމައި ޢާންމު ކުރާނެކަމަށެވެ.
ކުރީގެ ސަރުކާރުގެ ބޯހިޔާވަހިކަމުގެ ސްކީމުގެ ފުރަތަމަ ފިޔަވަހީގެ ދަށުން ފްލެޓު ލިބުނު މީހުންގެ ދާއިމީ ލިސްޓު އާންމު ކުރުމުން ބައެއް މީހުން ވަނީ އެ ފްލެޓު ލިސްޓަކީ ބޭއިންސާފުން އެކުލަވާލާފައިވާ ލިސްޓެއް ކަމަށް ބުނެ، އޭސީސީއަށް ޝަކުވާ ހުށަހަޅައިފައެވެ. އަދި އެ ޝަކުވާތަކާ ގުޅިގެން އޭސީސީގެ ތަހުގީގު ނިމެންދެން އެއްބަސްވުމުގައި ސޮއިކުރުމާއި ފްލެޓް ހަވާލު ކުރުމުގެ ކަންކަން މަޑުޖައްސާލަން އޭރު އޮތް ސަރުކާރަށް ކޮމިޝަނުން އެންގިއެވެ.
އެގޮތުން އެ މައްސަލަ ތަހުގީގު ކުރުމަށް ފަހު، އޭސީސީން ވަނީ ކުރީ ސަރުކާރުން ދޫކުރި 4000 ފްލެޓް ދީފައިވާ މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުން ކަމަށްވެސް ވިދާޅުވެފައެވެ.
