4 ޤައުމަކުން ރާއްޖެއަށް ކަނޑައެޅުއްވި ސަފީރުން، ސަފީރުކަމުގެ ރައީސުލްޖުމްހޫރިއްޔާއަށް އަރުވައިފިއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ހެނދުނު އޮތް ރަސްމިޔާތެއްގައި އަލަށް ކަނޑައެޅުއްވި ސަފީރުން ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އިރުވުމަށްޓަކައި ޖުމްހޫރީ މައިދާނުން ފެށިގެން ރައީސުލްޖުމްހޫރިއްޔާގެ އޮފީހާ ހަމައަށް ވަޑައިގެނެވީ، ހަތްކޮޅުގައި ރަސްމީ އިއްޒަތުގައި ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާއެކު ހިންގަވައިފައެވެ.
އަލަށް ކަނޑައަޅުއްވައި މިއަދު ފަތްކޮޅު އެރުވި ސަފީރުން:
- ސްވިޒަލެންޑް – ހަރ އެކްސެލެންސީ ސިރީ ވަލްޓް
- ނިއު ޒިލެންޑް – ހިޒް އެކްސެލެންސީ ޑޭވިޑް ޕައިން
- ޔޫރަޕިއަން ޔޫނިއަން – ހަރ އެކްސެލެންސީ މަރީއާ ކާމެން މޮރެނޯ ރޭމުންޑޫ
- އަންގޯލާ – ހިޒް އެކެސެލެންސީ ކްލެމެންޜޭ ޕެޑްރޯ ފްރާންސިސްކޮ
މިއަދު ފަތްކޮޅު އެރުއްވި ހުރިހާ ސަފީރުންނަކީވެސް ނޮން-ރެސިޑެންޓް ސަފީރުންގެ ގޮތުގައި ރާއްޖެއަށް ކަނޑައަޅުއްވާފައި ތިއްބަވާނެ ސަފީރުންކަމުން، އެ ބޭފުޅުން ތިއްބެވުމަށް ހަމަޖެހިފައިވަނީ، ސްރީލަންކާގެ ކޮލަމްބޯގައެވެ.
އެހެންނަމަވެސް އަންގޯލާގެ ސަފީރު ހުންނަވާނީ އިންޑިއާގެ ނިއުދިއްލީގައެވެ.
ރައީސް ޑރ. މުއިއްޒު ވަނީ ސަފީރުންނާ ބައްދަލުކުރައްވާ ރާއްޖެ އާއި އެ ގައުމުތަކުގެ ދެމެދުގައި އޮތް ގުޅުން އިތުރަށް ބަދަހި ކުރައްވާނެ ގޮތާގުޅޭ ގޮތުން މަޝްވަރާ ކުރައްވާފައެވެ. އޭގެ ތެރޭގައި ފަތުރުވެރިކަމާއި ތައުލީމީ ދާއިރާ އަދި ވިޔަފާރީގެ ދާއިރާތައް ހިމެނެއެވެ.
