މަޝްހޫރު ވިޔަފާރިވެރިޔާ އަދި ޙައްޖާއި އުމުރާއަށް މީހުން ގެންދާ މަޝްހޫރު ގްރޫޕް އަތަމާ ގްރޫޕްގެ ބާނީ އަބްދުއްލަތީފު ހުސައިން މަނިކު (އަތަމާ އަބްދުއްލަތީފް) އަވަހާރަވެއްޖެއެވެ.
އުމުރުފުޅުން 96 އަހަރުގައި މ.މެޑޯޒް، އަބްދުއްލަތީފު ހުސައިން މަނިކު އަވަހާރަވެފައިވަނީ، އޭޑީކޭ ހޮސްޕިޓަލްގައި އާލާސްކަންފުޅާކަށް ފަރުވާ ހޯއްދަވަމުން ގެންދަވަނިކޮށް މިއަދު މެންދުރުގެ ވަގުތެއްގައެވެ.
ދިވެހީން ހައްޖަށް ގެންދިއުމުގެ ޚިދުމަތް ފަސޭހަކޮށް، ވަރަށް ގިނަ އަހަރުތަކެއް ވަންދެއް ދެއްވި އަތަމަ އަބްދުއްލަތީފް އެންމެ ފުރަތަމަ އަމިއްލަ ވިޔަފާރިއެއް ފެއްޓެވީ ހާޑްވެއާގެ ސާމާނު ވިއްކެވުމުންނެވެ. އެއަށް ފަހު ހައްޖަށް މީހުން ގެންދިއުމާއި ޓޫރިޒަމްގެ ވިޔަފާރީގެ ތެރެއަށް ވެންނެވިއެވެ.
އަބްދުއްލަތީފް ހަތަރު ކައިވެންޏެއް ކުރެއްވިއިރު ނުވަ ބޭފުޅުން ލިބިވަޑައިގެންނެވިއެވެ. އެއީ ފަސް ފިރިހެން ބޭފުޅުންނާއި ހަތަރު އަންހެން ބޭފުޅުންނެވެ.
