އަލްމަރުޙޫމް އަތަމާ ޢަބުދުއްލަތީފަކީ ދީނީ ކަންކަން ކުރިއެރުވުމުގައި އިސްނެންގެވި މަދަދުގާރެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ މަރުޙޫމް ޢަބުދުއްލަތީފްގެ ޢާއިލާއަށް ތަޢުޒިޔާ ފޮނުއްވައި މިއަދު އެކްސްގައި އާންމުކުރެއްވި މެސެޖެއްގައެވެ.
މަރުޙޫމް ޢަބުދުއްލަތީފް ވަނީ ރާއްޖޭގައި ވިޔަފާރި ކުރިއެރުވުމަށް ދިގު މުއްދަތެއްގައި ގިނަ މަސައްކަތްތަކެއް ކޮށްދެއްވާފައިކަމަށާއި، އަދި ޖަމާޢަތަށް ފައިދާހުރި އެތައް ޚިދުމަތަކާއި، މިސްކިތް ބިނާކުރެއްވުމާއި، ގިނަ ޢަދަދެއްގެ ދިވެހީން ޙައްޖަށް ގެންގޮސްދެއްވުން ފަދަ ދަރުމަވެތި އެތައް ކަމެއް އެ ބޭފުޅާ ވަނީ ޤައުމަށްޓަކައި ކޮށްދެއްވާފައިކަމަށް ރައީސް ވިދާޅުވެފައިވެއެވެ.
ޢަބުދުއްލަތީފް އަވަހާރަވި ޚަބަރު އަޑުއެއްސެވީ ފުން ހިތާމައާއެކުގައިކަމަށް ވެސް ރައީސް ވިދާޅުވެފައިވެއެވެ.
އުމުރުފުޅުން 96 އަހަރުގެ އަބްދުއްލަތީފު ހުސައިން މަނިކު އަވަހާރަވެފައިވަނީ، އޭޑީކޭ ހޮސްޕިޓަލްގައި ފަރުވާ ހޯއްދަވަމުން ގެންދަވަނިކޮށް މިއަދުގެ މެންދުރުގެ ވަގުތެއްގައެވެ.