ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީގެ ރަސްމީ އީމެއިލްތައް ޑިލީޓް ކުރެއްވި މައްސަލަ ފުލުހުން ތަހުގީގު ކުރަން ފަށައިފިއެވެ.
ފުލުހުން މިއަދު ނޫސްވެރިންނާއި ހިއްސާ ކުރެއްވި މެސެޖެއްގައި ބުނެފައިވަނީ ކުރީގެ އެޑިއުކޭޝަން މިނިސްޓަރު ބޭނުން ކުރައްވަމުން ގެންދިޔަ ރަސްމީ އީމެއިލްގައިވާ ހުރިހާ މެއިލްއެއް 2023 ވަނަ އަހަރުގެ ތެރޭގައި ޑިލީޓް ކުރި މައްސަލައެއް ތަހުގީގު ކޮށްދެއްވުމަށް އެދި މިއަހަރުގެ ޖުލައި 25 ވަނަ ދުވަހު ފުލުހުންގެ ހިދުމަތަށް ހުށަހަޅާފައިވާ ކަމަށެވެ.
ފުލުހުންގެ ތަރުޖަމާނު އެސިސްޓެންޓް ކޮމިޝަނަރު އޮފް ޕޮލިސް އަހުމަދު ޝިފާން ވިދާޅުވީ އެއިދާރާއިން ބަލަމުން ދަނީ ކުރީ ސަރުކާރުގެ އެޑިއުކޭޝަން މިނިސްޓަރު ޑރ. އައިޝަތު އަލީ އާއި ގުޅޭ މައްސަލައެއް ކަމަށާއި އެއިދާރާއިން މިހާރު އެމައްސަލ ތަހުގީގު ކުރަމުން ދާކަމަށެވެ.
ރާއްޖޭގެ އޮންލައިން ނޫހެއްކަމަށްވާ މިހާރު ނޫހުން ފުލުހުންގެ ތަރުޖަމާނު އާއި ހަވާލާދީ ރިޕޯޓްކޮށްފައިވާ ގޮތުގައި މިމައްސަލަ ތަހުގީގު ކޮށްދިނުމަށް އެދި ފުލުހުންގެ އިދާރާއަށް ހުށަހަޅާފައިވަނީ އެޑިއުކޭޝަން މިނިސްޓްރީންނެވެ. އަދި ވީހާ ވެސް އަވަހަށް މިކަން ތަހުގީގު ކޮށްދިނުމަށް އެދިފައިވާ ކަމަށް ވެސް ޝިފާން އާއި ހަވާލާދީ މިހާރު ނޫހުން ރިޕޯޓް ކޮށްފައިވެއެވެ.
މީގެ އިތުރުން، ކުރީގައި އެޑިއުކޭޝަން މިނިސްޓްރީގައި އެމަގާމު އަދާކުރެއްވި އެހެން މިނިސްޓަރުންގެ ރަސްމީ އީމެއިލްތައް ހުރި ކަމަށާއި އެންމެ ފަހުގެ މިނިސްޓަރުގެ ރަސްމީ އީމެއިލްތައް ޑިލީޓް ކުރައްވާފައިވާ ކަން ފާހަގަވެފައިވާ ކަމަށް އެޑިއުކޭޝަން މިނިސްޓްރީގެ އިސް އޮފިޝަލަކު ވިދާޅުވި ކަމަށްވެސް މިހާރު ނޫހުން ރިޕޯޓް ކޮށްފައިވެއެވެ.
އެހެންނަމަވެސް އައިޝަތު އަލީ ވަނީ އޭނާގެ ރަސްމީ އީމެއިލްއަށް މީހަކު ވަންނަން މަސައްކަތް ކޮށްފައިވާ ކަމަށް މިއަދު ފޭސްބުކް ގައި ކުރެއްވި ފޯސްޓެއްގައި ވިދާޅުވެފައެވެ. އޭނާ އިތުރަށް ވިދާޅުވީ ވެރިކަން ނިމުނު ދުވަހު ރަސްމީ އީމެއިލް ޑިއެކްޓިވޭޓް ކޮށްފައިވާ ކަމަށެވެ. އަދި މިއަދު މެންދުރު 1:15 ގައި އެ ކައުންޓަށް މީހަކު ވަންނަން މަސައްކަތް ކޮށްފައިވަނީ ކީއްވެތޯ އޭނާ ވަނީ ސުވާލު އުފައްދާފައެވެ.
މީގެއިތުރުން، 17 ނޮވެމްބަރު 2023 ގެ ފަހުން އެއެކައުންޓުން އެއްވެސް ފަރާތަކަށް އީމެއިލްއެއް ލިބިއްޖެ ކަމުގައިވާ ނަމަ އެއީ އޭނާ ފޮނުވާފައިވާ އީމެއިލްއެއް ނޫން ކަމަށް ވެސް އޭނާ ވިދާޅުވި އެވެ.
