ދިވެހި ޤައުމިއްޔަތު ދިރުވައި ޢާލާކޮށް ދިވެހިންގެ ހިތްތަކުގައި ޤައުމާއި ޤައުމިއްޔަތަށް އޮތް ލޯބި އިތުރުކުރުމުގެ ގޮތުން ސަރުކާރުން ކުރަމުން އަންނަ މަސައްކަތްތަކުގެ ތެރެއިން، އިލްމީ ދިރާސާތަކެއް ކުރުމަށް “ދިވެހި ގައުމިއްޔަތުގެ އިސްވަރު”ގެ ނަމުގައި ކޮލެޖެއް އުފެއްދުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.
މިކަން ހާމަކުރައްވައި އެސްއެސްޓީވީން ގެނެސްފިން ޕްރޮގްރާމެއްގައި ވާހަކަފުޅުދައްކަވަމުން ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް ވިދާޅުވީ، މަދަރުސީ ބަޔަކާއި އިލްމީ ބަޔަކަށް ބަހާލެވިގެން ކުރިއަށް ގެންދާ ގައުމީ ލޯބި ދިވެހިންގެ މެދުގައި އާލަކުރުމުގެ މަސައްކަތުގެ ޢިލްމީ ބައި ކުރިއަށް ގެންދިއުމަށް ހަމަޖެހިފައިވަނީ ދިރާސާތަކާއި އެކަމާ ބެހޭ ވަސީލަތްތައް ގާއިމުކޮށްގެން ކަމަށެވެ.
މީގެ އިތުރުން އެ މަސައްކަތުގެ ތެރޭގައި ހިމެނޭ މަދަރުސީ ބައި ކުރިއަށް ގެންދިއުމަށް ހަމަޖެހިފައިވަނީ، އެޑިއުކޭޝަން މިނިސްޓްރީންކަމަށްވެސް ވަޒީރު ވަނީ ފާހަގަކުރައްވައިފައެވެ.
ހަމައެޔާއެކު ވަޒީރު ވަނީ ރައީސް އުފައްދަވައިފައިވާ ތަރިކަ ދިރާސާ ކުރާ ގައުމީ މަރުކަޒުގެ މަސައްކަތްތައް ފެށުމާއެކު ގައުމިއްޔަތު ކޮލެޖުގެ މަސައްކަތްތައް އިތުރަށް ފުޅާވެގެން ދާނެ ކަމަށެވެ.
އަދިހަމައެޔާއެކު ޤައުމިއްޔަތު ކޮލެޖަކީ ކިޔަވައިދިނުމަށް ޤާއިމްކުރެވޭ ކޮލެޖެއް ނޫންކަން ފާހަގަކުރައްވައި ވަޒީރު ވިދާޅުވީ، އެ ކޮލެޖްގެ ދަށުން ކުރިއަށް ގެންދިއުމަށް ހަމަޖެހިފައިވަނީ ރާއްޖޭގެ ސަގާފަތާ ގުޅޭ ތަފާތު ދިރާސާތައް ކުރުން ކަމުގައެވެ.
އަދި ކޮލެޖުގައި ތިބޭނީ އެކި ދާއިރާތަކުން “ރާއްޖެ ދަސްކޮށްފައިވާ” ހަރު މީހުން ކަމަށްވެސް ވަޒީރު ވިދާޅުވިއެވެ.
