ހިއުމަން ރައިޓްސް ކޮމިޝަން (އެޗްއާރްސީއެމް)ގެ މެންބަރު ކަމަށް އިލެކްޝަންސް ކޮމިޝަން (އީސީ)ގެ ކުރީގެ ނައިބު ރައީސް އިސްމާއީލް ހަބީބް އަބްދުއްރަހީމް އައްޔަންކުރުމަށް ރައްޔިތުން މަޖިލީހުގެ ހިއުމަން ރައިޓްސް ކޮމިޓީން ރުހުން ދީފިއެވެ.
އެ މަޤާމަށް ހަބީބް އައްޔަން ކުރުމަށް ރައްޔިތުންގެ މަޖިލިހުގެ ހިއުމަން ރައިޓްސް ކޮމިޓީން އިއްޔެ ހަބީބާއި އިންޓަރވިއު ކުރުމަށްފަހު މިއަދު ކުރިއަށް ދިޔަ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީ ބައްދަލުވުމުގައި ވަނީ, ހަބީބަށް ރުހުން ދިނުމާއި ގުޅޭގޮތުން ވޯޓަށް އަހައިފައެވެ.
އެގޮތުން ވޯޓަށް އެހުމުން ކޮމެޓީއަށް މިއަދު ހާޒިރުވެ ތިއްބެވި ހުރިހާ މެމްބަރުންގެ އިއްތިފާޤުން ނިންމެވީ އެޗްއާރްސީއެމްގެ މެންބަރަކަށް ހަބީބް އައްޔަން ކުރުމަށް ރުހުން ދިނުމަށެވެ.
އިއްޔެ ކުރިއަށް ދިޔަ އިންޓަރވިއުގައި ހަބީބް ވަނީ، ގާނޫނީ އަސާސީގައި ބަޔާންކޮށްފައިވާ އިންސާނީ ހައްގުތަކަށް އިހްތިރާމްކުރުމުގެ ސަގާފަތެއް ރާއްޖޭގައި އަށަގެންނެވުމަކީ އެ ބޭފުޅާގެ ތަޞައްވުރެއް ކަމަށާއި މަދަނީ ޖަމިއްޔާތަކާއި ހާއްސަކޮށް ސިޔާސީ ޕާޓީތަކާ އެކުގައި ގުޅުން ބަދަހިކޮށް އެޗްއާރްސީއެމްގެ ހަގީގީ ދައުރު އަދާކުރުމަށް މަސައްކަތްތަކެއް ކުރައްވާނެ ކަމަށް ވިދާޅެވެފައެވެ.
އެޗްއާރްސީއެމްގެ މެމްބަރެއްގެ މަގާމު ހުސްވީ، އެ މަގާމުގައި ކުރިން ހުންނެވި ޑރ. އަހްމަދު އަދުހަމް އަބްދުﷲ މިދިޔަ އޮކްޓޯބަރު މަހުގެ ތެރޭގައި މަޤާމުން އިސްތިއުފާ ދެއްވުމުންނެވެ.
21 އަހަރު ދުވަހުގެ މުއްދަތަކަށް ހަބީބް ވަނީ އިލެކްޝަންސް ކޮމިޝަނަށް ޚިދުމަތް ކުރައްވައިފައެވެ.
