މިއަހަރުގެ ދެވަނަ ކުއާޓާގައި ބީއެމްއެލްއަށް ސާފު ފައިދާގެ ގޮތުގައި 448 މިލިއަން ރުފިޔާ ލިބިއްޖެ އެވެ.
ބެންކް އޮފް މޯލްޑިވްސް (ބީއެމްއެލް) އިން މިއަދު ނެރެފައިވާ ބަޔާނެއްގައި ހާމަކޮށްފައިވާ ގޮތުގައި މި ކުއާޓާގައި ބޭންކުގެ ހިންގުމުގެ ފައިދާގެ ގޮތުގައި 698 މިލިއަން ރުފިޔާ ވަނީ ބޭންކަށް ލިބިފައެވެ. މިއީ މިދިޔަ އަހަރުގެ ދެވަނަ ކުއާޓާގައި ބޭންކަށް ލިބުނު އަދަދާއި އަޅާބަލާއިރު 3 ޕަސެންޓު އިތުރު އަދަދެކެވެ.
ބީއެމްއެލް އިން ހާމަކޮށްފައިވާ ގޮތުގައި މިއަހަރުގެ ފުރަތަމަ ހަ މަސްދުވަހު ބޭންކުން ވަނީ 2.8 ބިލިއަން ރުފިޔާގެ އައު ލޯނު އަމިއްލަ ފަރުދުންނާއި ވިޔަފާރިތަކަށް ދޫކޮށްފައިވާ ކަމަށާއި ވިޔަފާރީގެ މައިގަނޑު ހުރިހާ ދާއިރާ އަކުންވެސް ކުރިއެރުން ލިބިފައިވާއިރު ބޭންކުގެ ރައުސްމާލް ވަނީ ގާނޫނުން ލާޒިމްކުރާ މިންވަރަށްވުރެ މަތީގައި ހިފަހެއްޓިފައިވާ ކަމަށެވެ.
މީގެއިތުރުން، ބީއެމްއިލް މައުލޫމާތު ދީފައިވާ ގޮތުގައި މި ކުއާޓާ ނިމުނުއިރު، ޖުމްލަ އެސެޓް ވަނީ 44.9 ބިލިއަން ރުފިޔާ އަށް އަރައެވެ. އަދި އިންފްލޭޝަންއާ ގުޅިގެން އަންނަ ޕްރެޝަރުތަކާއެކުވެސް ހިންގުމުގެ ހަރަދުތައް ހިފެހެއްޓި ޕްރޮވިޝަން ކަވާ ހުރީ ހަރުދަނާކަމާއެކު 100 ޕަސެންޓުގައި ކަމަށް ބީއެމްއެލް އިން ބުނެފައިވެއެވެ.
މި ކުއާޓާގައި ބޭންކުން ހާސިލްކުރެވިފައިވާ ކަންކަމުގެ މައްޗަށް އަލިއަޅުވާލަމުން ބެންކުން ބުނެފައި ވަނީ ރާއްޖޭގެ ޝަރުއީ ހަމަތަކަށްފެތޭ ފުރަތަމަ ކްރެޑިޓް ކާޑު ބީއެމްއެލް އިން ތައާރަފް ކޮށްފައިވާ ކަމަށާއި ގެދޮރު އިމާރާތްކުރުމާއި މަރާމާތު ކުރުމަށް ކަސްޓަމަރުންގެ އޮތް ޑިމާންޑަށް ބަލައި ހޯމް ބިލްޑް އަދި ހޯމް އިކުއިޓީ ލޯނު ވެސް މިހާރު ބީއެމްއެލް އިން ތައާރަފް ކޮށްފައިވާ ކަމަށެވެ.
ބޭންކުގެ އަމާޒަކީ މުޅި ރާއްޖެ ހިމެނޭ ބޭންކިންގް ވިއުގަޔަކާއެކު 38 ބްރާންޗާއި ސާވިސް ސެންޓަރާއި 86 ސެލްފްސާވިސް ބޭންކިންގް ސެންޓަރާއި، 144 އޭޓީއެމް، ކޭޝް އޭޖެންޓުންގެ އިތުރުން އެންމެ ޒަމާނީ އޮންލައިން ބޭންކިން ހިދުމަތާއެކު ބޭންކް އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމުގައި ބީއެމްއެލް އިން ބުނެފައިވެއެވެ.
