ޖަޕާން ސަރުކާރާއި ދިވެހި ސަރުކާރައި ދެމެދު ވެފައިވާ ޕްރޮޖެކްޓް ފޯ ހިއުމަން ރިސޯސް ޑިވެލޮޕްމަންޓް ސްކޮލާޝިޕް (ޖޭޑީއެސް) ގެ ދަށުން ރާއްޖެއަށް 15 މިލިއަން ރުފިޔާގެ ހިލޭ އެހީ މިއަދު ހަދިޔާކޮށްފި އެވެ.
ފޮރިން މިނިސްޓްރީން ބުނެފައިވާ ގޮތުގައި ޖޭޑީއެސްގެ ދަށުން ޖަޕާން ސަރުކާރުން ރާއްޖެއަށް މިއަހަރަށް ހަ ސްކޮލާޝިޕްގެ ފުރުސަތު ދޭނެ ކަމަށާއި އެކަމަށް ހިލޭ އެހީގެ ގޮތުގައި ޖަޕާނުން 161 މިލިއަން ޖަޕަނީސް ޔެން (15.9 މިލިއަން ދިވެހި ރުފިޔާ) ދޭން ނިންމާފައިވާ ކަމަށެވެ.
މިކަމަށް ދިވެހި ސަރުކާރުގެ ފަރާތުން ސޮއިކޮށްފައިވަނީ ފޮރިން މިނިސްޓަރު މޫސާ ޒަމީރު އަދި ޖަޕާނު ސަރުކާރުގެ ފަރާތުން ސޮއިކުރެއްވީ ރާއްޖޭގައި ހުންނަވާ އެ ގައުމުގެ ސަފީރު ތަކެއުޗި މޮދޮރި އެވެ.
މިއީ ޖަޕާނުގެ ސަރުކާރުން 2020 ވަނަ އަހަރުން ފެށިގެން ރާއްޖެއަށް ދެމުން އަންނަ އެހީއެކެވެ. ޖަޕާނު ސަރުކާރު ދޭ މިއެހީގެ ދަށުން ޖަޕާނުގެ އެންމެ މަތީ ފެންވަރުގެ ޔުނިވާސިޓީތަކުގައި މާސްޓަސް ޑިގްރީ އަށް ކިޔެވުމުގެ ފުރުސަތު ދިވެހި ދަރިވަރުންނަށް ލިބިގެންދާނެ އެވެ.
ފޮރިން މިނިސްޓްރީން ހާމަކޮށްފައިވާ ގޮތުގައި މި ސްކޮލާޝިޕަކީ މުސްތަގުބަލުގައި އިޖުތިމާއީ، އިގްތިސޯދީ ތަރައްގީގެ ސިޔާސަތުތައް އެކުލަވާލުމާއި ތަންފީޒުކުރުމުގައި ޝާމިލުވާނެ ގާބިލު އަދި ގައުމު އާރާސްތުކުރުމަށް މުހިއްމު ރޯލެއް އަދާކުރާނެ ފުރުސަތެކެވެ.
