އިންސާނީ ވަގުފާރި ކުރާ މީހުންނާއި އެ މައްސަލަތަކުގައި ޝިކާރައަކަށްވާ މީހުންގެ މައްސަލަތަކުގެ ތަޙުޤީޤު ލަސްވާތީ ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިހްސާން ކަންބޮޑުވުން ފާޅުކުރައްވައިފިއެވެ.
އިހްސާން މި ފަދައިން ވިދާޅުވީ ބައިނަލްއަގްވާމީ އިންސާނީ ވަގުފާރިއާ ދެކޮޅަށް މަސައްކަތްކުރާ ދުވަސް ފާހަގަކުރުމަށް އިއްޔެ ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ. އިޙްސާން އިތުރަށް ވިދާޅުވީ އިންސާނީ ވަގުފާރީގެ މައްސަލަތަކުގެ ޝަރީޢަތްތައް ލަސްވުމަކީ އެ ކަމުގެ ޝިކާރައަކަށްވާ ފަރާތްތަކަށް ލިބޭ ބޭއިންސާފެއްކަމަށެވެ. އަދި މައްސަލަތައް ސާބިތުވާ މިންވަރު މަދުވުމަކީ އެ ފަދަ ކުށްތަކަށް އަރައިގަންނަ މީހުން އިތުރުވެ، އެ އަމަލުތަކުގެ ޝިކާރައަކަށް ވާ ފަރާތްތައް އިތުރަށް އިންސާނީ ވަގުފާރިއަށް ހުށައެޅިގެންދާނެ ކަމެއްކަމަށެވެ. އަދި ރާއްޖޭގައި އެ ކަން އެ ގޮތަށް ވުމުގެ ބިރު މިހާރު އެބަ އޮތްކަމަށް ވެސް ވަޒީރު ވިދާޅުވިއެވެ.
މި މައްސަލަތަކަށް ހައްލު ހޯދުމަށް ޕްރޮސިކިއުޝަން މަރުޙަލާގައި ހުންނަ ކަންކަމާއި، ދަޢުވާ ކުރުމުގައި ހުރި ގޮންޖެހުންތައް ދެނެގަނެ، އެ ކަންކަމުގައި ހުރި މައްސަލަތައް ހައްލުކުރުމަށް ޤާނޫނުތަކަށް ބަދަލު ގެނައުމަށް އިހްސާން ވަނީ ގޮވާލައްވާފައެވެ.
އިހްސާން ސިފުކުރެއްވި ގޮތުގައި އިންސާނީ ވަގުފާރިއަކީ ޒަމާނީ އަޅުވެތިކުރުމެވެ. އަދި އެ ކަމުގެ ހުރި ނުރައްކާތެރިކަމާއި، އެ ކަމާ ދެކޮޅަށް މަސައްކަތް ކުރާނެ މީހުން ބިނާކުރުމާއި، އެ ކަމާ މެދު އާންމުން ހޭލުންތެރިކުރުވުމާއި، އެ ކުށުގެ ޝިކާރައަށްވާ ފަރާތްތަކަށް ރައްކާތެރިކަން ކަށަވަރުކުރުމާއި، ކުށް ކުރާ ފަރާތްތައް ރިޕޯޓުކުރެވޭނެ ފޯން ލައިނެއް ގާއިމުކުރުމާ ގުޅޭ ގޮތުން ވެސް އިހްސާން ވާހަކަފުޅު ދެއްކެވިއެވެ.
މި ރަސްމިއްޔާތުގައި ވަނީ އިންސާނީ ވަގުފާރި ހިންގާ މީހުންގެ މައްސަލަތައް ރިޕޯޓްކުރުމަށް ޚާއްޞަ ފޯން ލައިނެއް ތައާރަފްކޮށްފައެވެ. އެގޮތުން އެ ފަދަ ކުށަކަށް މީހަކު އަރައިގަންނަކަން ދެނެގަނެވޭ ހިސާބުން ގުޅާނެ ފޯން ނަންބަރަކީ 9193939 އެވެ.
ތަފާސްހިސާބުތަކުން ދައްކާ ގޮތުގައި އިންސާނީ ވަގުފާރީގެ ޝިކާރައަކަށްވާ ކޮންމެ ތިން މީހެއްގެ ތެރެއިން އެކަކަކީ ކުޑަކުއްޖެކެވެ.
