ދިވެހިރާއްޖެއަށް އެންމެ ގިނަ އަދަދެއްގެ ފަތުރުވެރިން ޒިޔާރަތްކުރަ ޤައުމު، ޗައިނާގެ ޝިއާމެން އެއާލައިނުން ރާއްޖެއަށް ޝެޑިއުލް ދަތުރުތައް ފަށައިފިއެވެ.
އެގޮތުން މި އެއާލައިންގެ ފުރަތަމަ ދަތުރުގައި ބީ737 800 މަރުކާގެ ބޯޓެއް އިއްޔެ ހަވީރު ވަނީ ވެލާނާ އިންޓަރނޭޝަނަލް އެއާޕޯޓަށް ޖައްސައިފައެވެ.
ޝިއާމެނުން ރާއްޖެއަށް ކުރުމަށް ހަމަޖެހިފައިވާ ދަތުރުތަކުގައި ބޭނުން ކުރުމަސް ހަމަޖެހިފައިވަނީވެސް މި ބޯޓު މެއެވެ.
ޝިއާމެން އެއަރލައިންސްގެ ޝެޑިއުލްޑް ފްލައިޓްތައް ރާއްޖެއަށް ފެށުމާއި ގުޅިގެން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް ގެ ސީ.އީ.އޯ އަދި މެނޭޖިން ޑިރެކްޓަރ އިބްރާހިމް ޝަރީފް މުޙައްމަދު ވިދާޅުވީ، މީގެ ކުރިން ޗާޓަރކޮށް ދަތުރު ކުރަމުން އައި މި އެއަރލައިނުން ޝެޑިއުލް ދަތުރުތައް ފެށުމަކީ، ދުނިޔޭގެ އެކި ސަރަހައްދުތަކުން ރާއްޖެއަށް ދަތުރުކުރާ ފްލައިޓްތައް އިތުރުކުރުމަށް އެމް.އޭ.ސީ.އެލްއިން ކުރަމުންދާ މަސައްކަތްތަކަށް ލިބޭ ކުރިއެރުމެއް ކަމަށެވެ.
އަދި މި ދަތުރުތަކުގެ ސަބަބުން މިއަހަރު 2 މިލިއަން ފަތުރުވެރިން ރާއްޖެއަށް ގެނައުމަށް ސަރުކާރުން ކަނޑައަޅާފައިވާ ލަނޑުދަނޑި ޚާސިލްކުރުމަށް އެހީތެރިވެދޭނެ ކަމެއްކަމަށްވެސް އެބޭފުޅާ ވަނީ ވިދާޅުވެފައެވެ.
ޝިއާމެން އެއަރލައިންސް އިން ރާއްޖެއަށް ހަފްތާއަކު 3 ޝެޑިއުލް ދަތުރު ކުރުމަށް ވަނީ ހަމަޖެހިފައެވެ.
ޗައިނާގެ ހަތަރު އެއަރލައިނަކުން ރާއްޖެއަށް ދަތުރު ކުރެއެވެ. އެއީ ބެއިޖިން ކެޕިޓަލް، ސިޗުއާން އެއަރލައިންސް، ޗޮންޗިން އެއަރލައިންސް އަދި ޗައިނާ އީސްޓަރންއެވެ.
