ދިވެހިރާއްޖެއާއި ޗައިނާއާއި ދެމެދު ހެދުމަށް ނިންމާފައިވާ މިނިވަން ވިޔަފާރީގެ އެއްބަސްވުމުގެ އަސަރު ދިވެހި އިޤްތިޞާދީ ސިޔާތަކަށް ކުރާނެ ކަމުގައި އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ.
ފައްޔާޒު މިފަދައިން ވިދާޅުވީ، ހަވަރު ބެރު’ގެ ނަމުގައި އެމްޑީޕީން ބޭއްވި ޕެނަލް ޑިސްކަޝަންއެއްގައި ދެއްކެވި ވާހަކަފުޅުގައެވެ.
މި ޕެނަލް ޑިސްކަޝަންގައި ދެއްކެވި ވާހަކަފުޅުގައި ފައްޔާޒު ވިދާޅުވީ، ޗައިނާއާއެކު (އެފްޓީއޭ)އެއް ހެދުމަކީ ގައުމުގެ އިގުތިސާދީ ސިޔާދަތު ގެއްލޭނެ ކަމެއް ކަމަށާއި އިކޮނޮމިކް ސޮވިރިނިޓީ ނުވަތަ އިގުތިސާދީ ސިޔާދަތީ ރާއްޖެ ފަދަ އިމްޕޯޓަށް ބަރޯސާވެފައިވާ ގައުމަކަށް ވަރަށް ބޮޑަށް ގުޅިފައިވާ ކަމެއް ކަމަށެވެ.
އެގޮތުން އިޤްތިޞާދީ ސިޔާދަތު ހިފެހެއްޓޭނީ ޓްރޭޑް ސޮވެރިނިޓީ ނުވަތަ ވިޔަފާރީގެ ސިޔާދަތު ހިފެހެއްޓިގެން ފާހަގަކުރައްވައި ފައްޔާޒު ވިދާޅުވީ، ރާއްޖެ ފަދަ ގައުމަކުން މުދާ އެތެރެކުރާއިރު އެކަމަށްޓަކައި ކަނޑައެޅިފައިވާ ސިޔާސަތުތައް ވާންޖެހޭނީ ވަރަށް ވަރުގަދަ ސިޔާސަތުތަކަކަށް ކަމަށެވެ.
އަދި އެ މުޢާމަލާތްތައް ވާންޖެހޭނީ ވަކި ބަޔަކަށް ނުވަތަ ޤައުމަކަށް ބަރޯސާނުވެ ކުރިއަށް ގެންދާ މުޢާމަލާތްތަކަކަށް ކަމުގައިކަމަށް ފައްޔާޒްގެ ވާހަކަފުޅުގައި ވިދާޅުވިއެވެ.
މީގެ އިތުރުން އެއް ގައުމުން އުފައްދާ ތަކެތި އަނެއް ގައުމަށް ޑިއުޓީއާ ނުލައި ވެއްދުމަށް ފުރުސަތު ލިބިދޭ އެފްޓީއޭއެއް އޮތުމަކީ އޭގެ ޒާތުގައި މައްސަލައެއް ނޫންކަން ފާހަގަކުރައްވަނުން ފައްޔާޒް ވަނީ، ޗައިނާއާއެކު އެފްޓީއޭއެއް ހެދުމުގައި އޮތް ކަންބޮޑުވުމަކީ، ވިޔަފާރިވެރިންނަށް މުދާ ގެންނަން ޗައިނާއަށް ބަރޯސާވާން ޖެހިދާނެތީ ކަމަށް ކަމުގައި ވިދާޅުވެފައެވެ.
ޗައިނާއަކީ އުފެއްދުންތެރިކަން ބޮޑު ގައުމަކަށްވާއިރު، އެގައުމުގެ އުފެއްދުންތަކުން ޑިއުޓީ ކަނޑައި، ރާއްޖެއިން ވިޔަފާރިކުރާ އެހެން ގައުމުތަކުން ޑިއުޓީ ނަގާނަމަ ވިޔަފާރިވެރިންނަށް ޖެހޭނީ ހަމައެކަނި ޗައިނާއިން ތަކެތި ގެންނަން ކަމަށް ފައްޔާޒު ވިދާޅުވިއެވެ.
ދެ އަހަރު ދުވަހުގެ ދިގު މަޝްވަރާތަކަކާށް ފަހު ރާއްޖެއިން ޗައިނާއާ އެކު މިނިވަން ވިޔަފާރީގެ އެއްބަސްވުމެއްގަައި ސޮއިކުރީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި 2014 ވަނަ އަހަރުގެ ޑިސެމްބަރު މަހުގެ ތެރޭގައެވެ. އެކަމަކު، އެ އެއްބަސްވުމަށް އަމަލުކުރަން މަޖިލީހުން ފާސްވީ 2017 ވަނަ އަހަރުގެ ނޮވެމްބަރު މަހުއެވެ.
