ސްކޭމްގެ މައްސަލަތަކުގައި ގިނަ އަދަދެއްގެ ބެންކް އެކައުންޓާއި ސިމް ކާޑްގެ ހިދުމަތްތައް ބްލޮކް ކޮށްފައިވާނޭ ކަމަށް ފުލުހުންގެ އެންޓީ ސްކޭމް ސެންޓަރުން ބުނެފިއެވެ.
ފުލުހުން ބުނެފައިވާ ގޮތުގައި ސްކޭމްގެ މައްސަލަތައް ހައްލު ކުރުމަށް އެއިދާރާއިން އަންނަނީ ގިނަ މަސައްކަތްތަކެއް ކުރަމުން ކަމަށާއި އެގޮތުން މިހާތަނަށް ގިނަ އަދަދެއްގެ އެކައުންޓާއި ސިމް ކާޑްގެ ހިދުމަތް ހުއްޓުކަމަށް ގެނެސްފައިވާ ކަމަށެވެ.
ރައްޔިތުންގެ މަޖިލީހުގެ އެސްއޯއީ ކޮމިޓީގައި ވާހަކަ ދައްކަވަމުން މިއަދު އެންޓި-ސްކޭމް ސެންޓަރުގެ ހެޑް އަދި އިންސްޕެކްޓާ އޮފް ޕޮލިސް މަރިޔަމް ރަޝީދާ ވިދާޅުވީ މި އަހަރުގެ މިހާތަނަށް ސްކޭމް މައްސަލަތަކުގައި 500 އަށް ވުރެ ގިނަ ބޭންކް އެކައުންޓާއި، 782 ޑިވައިސް ނެޓްވޯކް އަދި 70 ވެބް ލިންކް ބްލޮކް ކޮށްފައިވާ ކަމަށެވެ. އަދި 297 ސިމްކާޑު ޓާމިނޭޓް ކުރުވިފައިވާ ކަމަށް ވެސް އޭނާ ބުނެފައިވެއެވެ.
ފުލުހަށް ހުށަހަޅާފައިވާ ސްކޭމްގެ މައްސަލަތަކުގެ ތެރެއިން 156 މައްސަލައެއް ތަހުގީގު ކުރުމަށްފަހު ދައުވާކުރުމަށް ޕީޖީއަށް ފޮނުވާފައިވާ ކަމަށާއި އޭގެ ތެރެއިން ގިނަ މައްސަލަތަކުގެ ޝަރީޢަތް މިހާރު ކުރިއަށްދާ ކަމަށް މަރިޔަމް ވިދާޅުވިއެވެ.
ސްކޭމް އާއި ގުޅުން ހުރި 1661 އެއް މައްސަލައެއް ހުސްވި އަހަރުގެ ތެރޭގައި ފުލުހުންގެ އިދާރާއަށް ރިޕޯޓް ކޮށްފައިވާއިރު، މަރިޔަމް ވިދާޅުވީ އެއީ އެއީ 20 މިލިއަން ރުފިޔާގެ ސްކޭމް ކަމަށެވެ. އަދި މިއަހަރުގެ ޖެނުއަރީ މަހުގެ ނިޔަލަށް 1302 ސްކޭމްގެ މައްސަލައެއް ރިޕޯޓް ކޮށްފައިވާ ކަމަށް ވެސް އޭނާ ވިދާޅުވިއެވެ.
މީގެއިތުރުން އެމްއެމްއޭގެ ލަފާއާއިއެކު ހުރިހާ މުވައްސަސާ ތަކުން މިހާރު ވަނީ މަލްޓި އެޖެންސީ އެޕްރޯޗެއްގައި އާގޮތަކަށް މަސައްކަތް ފަށާފައިވާ ކަމަށާއި އެގޮތުން ކޮންމެ އަތޮޅެއްގައި ސްކޭމް ކަންތައްތަކާ ބެހޭ ހާއްސަ އޮފިސަރެއް ބަހައްޓާފައިވާ ކަމަށް ފުލުހުން ބުނެފައިވެއެވެ
