ސިންގަލް ޔޫސް ޕްލާސްޓިކް މަނާކުރުމުގެ ލިސްޓުގެ ދަށުން ޕްލާސްޓިކް ކުދި ފެންފުޅި މަނާކުރުން 2026 ވަނަ އަހަރަށް ފަސްކޮށްފި އެވެ.
ރައީސް ޑރ. މުޢިއްޒު ސޮއި ކުރައްވާ ނެރުއްވާފައިވާ ގަރާރެއްގައި ބަޔާންކޮށްފައިވާ ގޮތުގައި އެއް ލީޓަރާއި އެއް ލީޓަރަށް ވުރެ ކުދި 500 މިލިމީޓަރުގެ ޕްލާސްޓިކް ފުޅީގައި ބަންދުކޮށްފައި ހުންނަ ފެން ރާއްޖެ އަށް އެތެރެކުރުމާއި އުފެއްދުން ވެސް އަންނަ އަހަރުގެ ޑިސެމްބަރު އެކަކުން ފެށިގެން މަނާ ވާނެ ކަމަށާއި މާޗު 1، 2026 އިން ފެށިގެން ބާޒާރަށް ނެރުން މަނާ ވާނެ ކަމަށެވެ.
ކުރިން ކަނޑައަޅާފައިވާ ގޮތުގެ މަތިން މިއަދަކީ ޕްލާސްޓިކް ކުދި ފެންފުޅި މަނާ ކުރާ ތާރީހެވެ. އޭގެ ކުރިން މިދިޔަ އަހަރު މަނާކުރުމަށް ކަނޑައަޅާ، ހުސްވި އަހަރު ޑިސެމްބަރު މަހުގައި ރައީސް ނެރުއްވި ގަރާރަކުން އެތާރީހް މިއަދަށް ފަސްކުރިއެވެ. މިއީ ތާރީޙް ފަސް ކުރެވުނު ދެވަނަ ފަހަރެވެ.
ރާއްޖެ އަށް އެތެރެކުރުމާއި އުފެއްދުމާއި ބާޒާރަށް ނެރުން މަނާ، އެއް ފަހަރު ބޭނުންކޮށްފައި އުކާލާ ޕްލާސްޓިކުގެ ބާވަތްތަކުގެ ލިސްޓު އެކުލަވާލެއްވީ ކުރީގެ ރައީސް އިބްރާހިމް މުޙައްމަދު ސޯލިޙް އެވެ. މިލިސްޓް އެކުލަވާލެއްވުމަށްފަހު، ލިސްޓްގައިވާ 14 ބާވަތެއްގެ ޕްލާސްޓިކް އެކި ތާރީހުތަކަށް ބަހާލައިގެން މަނާ ކުރުމަށް ހަމަޖެހިފައިވާ އިރު، މިހާތަނަށް 13 ބާވަތެއް ވަނީ މަނާ ކުރެވިފައެވެ.
