ޕޭމަންޓް ޕްރޮސެސް ކުރުމުގެ ތެރޭގައި ބައެއް މީހުންގެ އެކައުންޓުތަކަށް ގިނަ އަދަދެއްގެ ޑޮލަރު އަދި ރުފިޔާ ޖަމާކުރެވުނީ އޮޅިގެން ކަމަށް ބޭންކް އޮފް މޯލްޑިވްސް އިން ބުނެފިއެވެ.
ބީއެމްއެލް އިން ބުނެފައިވާ ގޮތުގައި ބައެއް މީހުންގެ އެކައުންޓަށް ގިނަ އަދަދެއްގެ ޑޮލަރު އަދި ފައިސާ ޖަމާކުރެވުނީ ޕޭމަންޓް ޕްރޮސެސް ކުރުމުގައި ދިމާވި ހިއުމަން އެރޯއެއްގެ ސަބަބުން ކަމަށާއި މިހާރު އެކައުންޓްތައް ދެނެގަނެ އެ ފައިސާ އަނބުރާ ހޯދާފައިވާ ކަމަށް ވެސް ބީއެމްއެލް އިން ވަނީ ބުނެފައެވެ.
މިމައްސަލަ މިހާރު ހައްލު ކުރެވިފައިވާއިރު، މި މިކަމުގެ ސަބަބުން އެއްވެސް ކަހަލަ މާލީ ގެއްލުމެއް އެއްވެސް ފަރާތަކަށް ލިބިފައި ނުވާ ކަމަށާއި މިއީ ބަލްކް ޕޭމެންޓް ޕްރޮސެސްއަށް ގެނައި ބަދަލަކާއި ގުޅިގެން ދިމާވި ކަމެއް ކަމަށް ބީއެމްއެލްއިން ބުނެފައިވެއެވެ.
ބީއެމްއެލް އިން ހާމަކޮށްފައިވާ ގޮތުގައި ބީއެމްއެލްގެ ސިސްޓަމްތަކަކީ ރައްކާތެރި ސިސްޓަމް ތަކެކެވެ.
ބީއެމްއެލް އިން ޕޭމަންޓް ޕްރޮސެސް ކުރުމުގައި ދިމާވި ހިއުމަން އެރޯގައި ލިލީ ބީޗް ރިސޯޓުގެ ބައެއް މުވައްޒަފުންގެ އެކައުންޓަށް ވަނީ 77 މިލިއަން ޑޮލަރު ޖަމާވެފައެވެ.
މިމައްސަލަ ހައްލު ކުރުމަށް ބީއެމްއެލްގެ އެޕްގެ ހިދުމަތް 3 ގަނޑިއިރަށް މެދުކަނޑާލި އެވެ. އެހެންނަމަވެސް މައްސަލަ ހައްލު ކުރުމަށްފަހު މިހާރު އަލުން އެޕްގެ ހިދުމަތް ދޭން ފަށާއިފިއެވެ.
