ހުޅުމާލޭ ވިނަރެސް ފްލެތް ކައިރީގައި ހިނގި ނުރައްކާތެރި އެކްސިޑެންޓްގައި އަނިޔާ ލިބުނު މީހާގެ ކަނދުރާ އާއި މައިބަދައިގައި ރެދުލާފައިވާ ކަމަށާއި، އޭނާގެ ހާލު ސީރިއަސް ކަމަށް ފުލުހުން ބުނެފިއެވެ.
ފުލުހުން މިހެން ބުނެފައި ވަނީ މިމައްސަލަ އާއި ގުޅިގެން ހައްޔަރުކޮށްފައިވާ ތިން މީހުންނާއި ގުޅޭ ގޮތުން ފުލުހުން ތައްޔާރުކޮށް ކޯޓަށް ހުށަހަޅާފައިވާ ރިޕޯޓްގައެވެ. ފުލުހުން ހުށަހަޅާފައިވާ ރިޕޯޓްގައި ބަޔާންކޮށްފައިވާ ގޮތުގައި އަނިޔާ ލިބުނު މީހާ އެކްސިޑެންޓްވެ ގޮސް ފުރަތަމަ ޖެހުނީ ކަނދުރާއެވެ. އޭނާގެ ކަނދުރާ ޖެހުމުން، ކަނދުރާގައި ރެދުލާފައިވާއިރު، މައިބަދައިގައިވެސް ރެދުލާފައިވާ ކަމަށާއި، ބޯ ފަޅައިގެން ގޮސްފައިވާ ކަމަށްވެސް ފުލުހުން ބުނެފައި ވެއެވެ. އަދި އޭނާގެ ހާލު ސީރިއަސް ކަމަށްވެސް ފުލުހުން ވަނީ ހާމަކޮށްފައެވެ.
އިއްޔެ މެންދުރު ބާރު ސްޕީޑްގައި ދުއްވާފައި އައި ކާރެއް ވިނަރެސް ފްލެޓް ކުރިމަތީގައި ޕާކުކޮށްގެން އިން ސައިކަލެއްގައި ޖެހި ސައިކަލުގައި އިން ޒުވާނާ ދިޔައީ ވިއްސައިގެންނެވެ. އެވަގުތު ކާރުގައި އިން ދެމީހަކު ފަލި ނަމަވެސް ފުލުހުން ވަނީ އެދެމީހުންނާއި އެކު ކާރުގައި އިން ތިން މީހުންވެސް ރޭގެ ވަގުތެއްގައި ހައްޔަރުކޮށް އެމީހުންގެ ވަނަވަރު އާންމުކޮށްފައެވެ.
މިމައްސަލަ އާއި ގުޅިގެން ފުލުހުން ހައްޔަރު ކޮށްފައިވަނީ ކ. މާލެ، ހ. ނޫރަންމާގެއާގެ/ އިކްރާމުއްރަހްމާން، ކ. މާލެ، މ. ލޭންޑްއޮފްގާރޑްން/ އިބްރާހީމް އިކްރާމް އަދި ގއ. ކަނޑުހުޅުދޫ، އާޒާދުގެ/ ޖިނާހް އިސްމާޢީލް އެވެ.
އެމީހުންގެ ބަންދާއިމެދު ގޮތެއް ނިންމުމަށް ކޯޓަށް ހާޒިރު ކުރުމުން ކޯޓުން ވަނީ ތިން މީހުންގެ ތެރެއިން ދެމީހަކު ޝަރީއަތް ނިމެންދެން ބަންދުކުރުމަށް އަމުރުކޮށްފައެވެ. އަދި ތިން ވަނަ މީހާގެ ބަންދަށް 15 ދުވަސް ވަނީ ޖަހާފައެވެ.
