ޓްރެފިކް ވަޔޮލޭޝަންގެ މައްސަލަތަކާ ގުޅިގެން ސަރުކާރުން އަޅަމުންދާ ހަރުކަށި ފިޔަވަޅުތަކަކީ މާލެއާއި ހުޅުމާލޭގައި ދިރިއުޅޭ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް އަޅަމުންދާ ފިޔަވަޅުތަކެއްކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.
އޮގަސްޓް 1 ވަނަ ދުވަހު އަލަށް ތަންފީޒުކުރަން ފެށި “މާލެ ފަހި” ޕްރޮގްރާމާ ގުޅިގެން، ފުލުހުން ވަނީ ވަރުގަދަ ފިޔަވަޅުތަކެއް އަޅަން ފަށާފައެވެ. އެގޮތުން ޤަވައިދާ ޚިލާފަށް މަގުތަކުގައި ބަހައްޓާފައިވާ ވެހިކަލްތައް މިހާރު ވަނީ ނަގަން ފަށާފައެވެ. އަދި ޤަވައިދާ ޚިލާފަށް ރެޖިސްޓްރީކޮށްފައިވާ ވެހިކަލްތައް ވެސް ފުލުހުން ވަނީ ޓޯކުރަންފަށާފައެވެ. މި ކަމާ ގުޅިގެން އާންމުން ވަނީ މަގުތަކަށް ނުކުމެ އަޑުގަދަކޮށްފައެވެ.
މި ކަމާ ގުޅިގެން އަމީން އެކްސްގައި ކުރެއްވި ޕޯސްޓެއްގައި ވިދާޅުވީ މާލޭގެ ޓްރެފިކް މައްސަލަ މިހާރު އޮތީ، މާލޭގައި ދިރިއުޅެން އުނދަގޫވާ މިންވަރަށްކަމަށެވެ. އަމީން ސިފަކުރެއްވި ގޮތުގައި މި ހިސާބަށް މާލޭގެ ހާލަތު އަންނަން ޖެހުނީ ނިމިދިޔަ ސަރުކާރުގައި ޤަވާއިދާ ޚިލާފަށް ވެހިކަލް ހުއްދައާއި ގަރާޖު ސިޓީ ދޫކޮށްފައިވާތީއެވެ.
މި މައްސަލަ ޙައްލުކުރުމަށް ޢަމަލީ ގޮތުން ހަރުދަނާ ފިޔަވަޅުތަކެއް އަޅަން މިހާރު ވާނީ ފަށާފައިކަމަށް ވެސް ވަޒީރު ވިދާޅުވެފައިވެއެވެ. އަދި މަސައްކަތުގައި ރައްޔިތުންގެ ފަރާތުން ލިބެމުންދާ އެއްބާރުލުން އެ މަނިކުފާނު ވަނީ ފާހަގަކުރައްވާފައެވެ. ކުރިއަށް އޮތް ތަނުގައި ސަރުކާރުގެ ސިޔާސަތުތައް ތަންފީޒުކުރަމުންދާ އިރު ރައްޔިތުންނާއި ސަރުކާރުގެ ކަމާ ގުޅުންހުރި މުވައްސަސާތަކުގެ އެއްބާރުލުން ދެއްވުމަށް ވަޒީރު ވަނީ އެދިވަޑައިގެންފައެވެ.
“މާލެ ފަހި” ޕްރޮގްރާމަކީ ގްރޭޓަރ މާލެ ސަރަހައްދުގައި އެއްގަމު އުޅަނދު އާދަޔާ ޚިލާފަށް އިތުރުވުމުގެ ސަބަބުން ކުރިމަތިވެފައިވާ ޓްރެފިކްގެ މައްސަލަތަކަށް އެކަށީގެންވާ ހައްލެއް ހޯދައި، މާލެ ސަރަހައްދުގެ މަގުތަކަކީ ހިނގާމީހުންނަށާއި އުޅަނދު ދުއްވާ ފަރާތްތަކަށް ރައްކާތެރި އަމާން ތަނަކަށް ހެދުމުގެ މަޤްޞަދުގައި ފަރުމާކޮށްފައިވާ ޕްރޮގްރާމެއްކަމަށް ރައީސް އޮފީހުން ހާމަކޮށްފައިވެއެވެ.
