މާލެ ސަރަހައްދުގެ ގޭބިސީތަކުގެ ކަރަންޓް ބިލު އިންތިހާއަށް އުފުލޭ މައްސަލަ އިތުރަށް ބަލައި ސަބަބު ދެކެގަތުމަށްޓަކައި އޮޑިޓެއް ކުރުމަށް ނިންމައިފިއެވެ.
މިކަން ހާމަކޮށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވީ، މާލެ އާއި ހުޅުމާލެއިން ކަރަންޓު ބިލު އިންތިހާއަށް ބޮޑު ގެތަކެއް ފާހަގަކުރެވިފައިވާ ކަމަށާއި އެ ގެތަކަށް ގޮސް ސްޓެލްކޯގެ ޓެކްނީޝަނުން ގޮސް ހަކަތައިގެ އޮޑިޓެއް ހަދަން ނިންމައިފައިވާ ކަމަށެވެ.
އެގޮތުން މި ފާއިތުވި މަސްތަކާއި އަޅައި ބަލާއިރު، މި މަހު މާލެއިން 94 އިންސައްތަ ކަރަންޓު ބިލުތައް ކުޑަވެފައިވާކަން ފާހަގަ ކުރައްވައި ފަހުމީ ވިދާޅުވީ، މާލެއަށް ބަލާއިރު ހަ އިންސައްތަ ބިލް އިންތިހާއަށް ބޮޑު ކަމަށާއި ހުޅުމާލެއިން ވެސް 15 އިންސައްތަ ބިލު އިންތިހާއަށް ބޮޑުކަން ފާހަގަކުރެވޭ ކަމަށެވެ.
އެގޮތުން ކަރަންޓް ބިލުތައް އިންތިހާއަށް ބޮޑުވާ ސަބަބު ދެނެގަނެވެން ޖެހޭ ކަމަށާއި އެ ސަބަބުތައް ސްޓޭލްކޯއާއި ޚިދުމަތް ހޯދާ ކަސްޓަމަރުންނަށްވެސް އެނގެން ޖެހޭކަމަށް ފަހުމީ ވަނީ ވިދާޅުވެފައެވެ.
އެގޮތުން ބިލު ބޮޑުވާކަމަށް ފާހަގަކުރެވޭ ގެތަކަށް ގޮސް އެތަންތަނުގައި ބޭނުންކުރާ އާލާތްތަކާއި ޖުމްލަ އެޕާޓްމެންޓްގެ އިންސިއުލޭޝަން ހުރީ ކިހިނެއްތޯ ބަލައި އެ މައުލޫމާތު ކަސްޓަމަރުންނާއި ހިއްސާ ކުރެވިގެން ދާނެކަމަށެވެ.
ފަހުމީ ވިދާޅުވީ މި ގޮތަށް ކަންތައް ކުރުމުން އެ ފަރާތްތަކަށްވެސް ކަރަންޓު އިގުތިސާދު ކުރުމަށް ކުރެވިދާނެ ކަންތައްތަކެއް އޮތްތޯބަލައި، އެ ފިޔަވަޅުތައް އެޅުމަށް މަގުފަހިވާނެ ކަމަށެވެ.
ފާއިތުވެ ދިޔަ ދެ ތިން މަހު ވެސް ކަރަންޓު ބިލު ބޮޑުވެ، އާންމުން ވަނީ ސޯޝަލް މީޑިއާގައި އެތައް ޝަކުވާތަކެއް ކޮށްފައެވެ.
