ރާއްޖޭގެ އުތުރުގައި ބަންކަރިންގެ ޚިދުމަތް ފެށުމަށްޓަކައި ބޭނުންވާ އުޅަނދުތައް ރާއްޖެ ގެނެއްސިއެވެ.
ބަންކަރިންގް ގެ ޚިދުމަތަށް ބޭނުންވާ ޕައިލެޓް ބޯޓާއި ޓަގުބޯޓު ވޯޓާ ސެލިއުޓާއެކު އިއްޔެ ވަނީ ހދ. ކުޅުދުއްފުށީ ޕޯޓަށް ބަނދަރުކޮށްފައެވެ.
މި މަހުގެ ތެރޭގައި ރާއްޖޭގެ އުތުރުގައި ބަންކަރިންގެ ޚިދުމަތް ފެށުމަށް ހިފައިވާ އަމާޒުގެ ދަށުން މިހާރު ވަނީ ހއ. އިހަވަންދޫގައި ޔޮޓް މެރީނާއެއް ތަރައްގީކުރާނެ ބަޔަކު ހޯދުމަށް ވެސް އޮތީ އިއުލާނުކޮށްފައެވެ.
ކުރިއަށް އޮތް މަހެއްހާ ދުވަހުގެ ތެރޭ ރާއްޖޭގައި ބަންކަރިންގެ ޚިދުމަތް ފެށުމާ އެކު، އިގުތިޞާދަށް ބޮޑު ކުރިއެރުމެއް ލިބޭނެ ކަމަށް އިކޮނަމިކް މިނިސްޓަރު މުޙައްމަދު ސައީދު ވަނީ ވިދާޅުވެފައެވެ.
އެގޮތުން ރާއްޖޭގެ އުތުރުގައި 300 އާއި 450އާ ދެމެދުގެ އަދަދަކަށް ކޮމާޝަލް ބޯޓުފަހަރު ދަތުރު ކުރަމުންދާކަމަށާއި ބޯޓުފަހަރުތަކުގެ އެއް ޕަސެންޓަށް ބަންކަރިންގެ ޚިދުމަތް ދިނަސް، ޚިދުމަތް ފަށާ ފުރަތަމަ އަހަރު ރާއްޖޭގެ ޖީޑީޕީ 400 މިލިއަން ޑޮލަރަށް އަރާނެ ކަމަށް ވަޒީރު ވަނީ ވިދާޅުވެފައެވެ.
ހަމައެޔާއެކު ބަންކަރިންގެ ޚިދުމަތް ފެށުމަށް ބޭނުންވާ ދެ ޓޭންކަރު ވެސް މިހާރު ގަނެފައިވާކަމަށް ވަޒީރު ވަނީ ވިދާޅުވެފައެވެ.
އިހަވަންދިއްޕޮޅުގައި ބައިނަލްއަގުވާމީ ބަންކަރިން މަޝްރޫއެއް ފެށުމަށް އެސްޓީއޯއާއި ވިޓޯލް ގްރޫޕާ ދެމެދު އެއްބަސްވުމެއްގައި ސޮއިކުރީ މިދިޔަ މާޗުމަހުގެ 13ވަނަ ދުވަހުއެވެ.
