އޯލެވެލް ނިންމާ ދަރިވަރުންނަށް ހަޔަރ އެޑިއުކޭޝަންގައި ވޮލަންޓިއަރެއްގެ ގޮތުގައި މަސައްކަތްކުރުމުގެ ފުރުސަތު ހުޅުވާލައިފިއެވެ.
އެގޮތުން މި ފުރުސަތު ހުޅުވާލައި އެ މިނިސްޓްރީން ވަނީ މިއީ، ކިޔަވައި ނިމިގެން ވަޒިފާގެ މާހައުލަށް ނުކުންނަން ބޭނުންވާ ދަރިވަރުންނަށް، މަސައްކަތުގެ ތަޖުރިބާ ފޯރުކޮށްދިނުމާއި މަސައްކަތް ކުރުމުގެ ޝައުގުވެރިކަން އުފެއްދުމުގެ މަޤްސަދުގައި ފަހިކޮށްދެވޭ ފުރުސަތުތަކެއް ކަމަށެވެ.
އެގޮތުން ވޮލަންޓިއަރުންގެ ގޮތުގައި މަސައްކަތް ކުރާ ދަރިވަރުންގެ މަސައްކަތަށް ތިން މަސް ވުމުން އަދާކުރި މަސައްކަތުގެ ތަޖުރިބާ ލިބުނުކަން އަންގައިދޭ ސެޓްފިކެޓެއް ދެވޭނެ ކަމަށާއި ތިން މަހަށް ވުރެ އިތުރަށް ވެސް މަސައްކަތް ކުރަން ބޭނުންވާ ނަމަ އެ ފުރުސަތު އޮންނާނެ ކަމަށް މިނިސްޓްރީން ވިދާޅުވިއެވެ.
އެހެންކަމުން ވޮލަންޓިއަރެއްގެ ގޮތުގައި މަސައްކަތް ކުރުމުގެ ޝައުޤުވެރިކަން ހުރި ދަރިވަރުން މި ހަފްތާގެ ބުދަ ދުވަހުގެ ނިޔަލަށް އެކަން ހާމަކޮށް ލިޔުމަކުން އެ މިނިސްޓްރީއަށް އެދުމަށްވެސް އެފަރާތުން ވަނީ އެދިލައްވައިފައެވެ.
އަދި ހުށަހަޅާ ލިޔުމުގެ އިތުރުން ގުޅޭނެ ފޯނު ނަންބަރާއި އީ-މެއިލް އެޑްރެސް ހިމެނޭ ގޮތަށް ސީވީ އާއި އައިޑީ ކާޑުގެ ކޮޕީގެ އިތުރުން 18 އަހަރު ފުރިފައި ނުވާ ނަމަ ބެލެނިވެރިޔާގެ އިޢުތިރާޒެއް ނެތްކަމުގެ ލިޔުމެއް ހުށަހެޅުމަށްވެސް ހަޔަރ އެޑިއުކޭޝަން މިނިސްޓްރީން ވަނީ އެދިފައެވެ.
މިކަމާ ގުޅޭ އިތުރު މައުލޫމާތު 3026914 އަދި 3026951 އިން ހޯދޭނެއެވެ.
ތައުލީމު ހާސިލުކޮށްގެން މުޖުތަމައުއަށް ނުކުންނަ ޒުވާނުންނަށް ވަޒިފާގެ ފުރުސަތު ހޯދައިދިނުމަކީ މި ސަރުކާރުގެ ވައުދެކެވެ.
