ނ ހެނބަދޫ ފުލުހެއްގެ ސައިކަލުގައި ރޯކޮށްދި ދެމީހަކު މިއަދު ހައްޔަރުކޮށްފިއެވެ.
ފުލުހުން ވިދާޅުވީ، މަސްތުވާތަކެއްޗާ ދެކޮޅަށް ނ. އަތޮޅުގައި ފުލުހުން ޚާއްސަ އޮޕަރޭޝަނެއް ހިންގަމުން ދަނިކޮށް މި މަހުގެ އެއްވަނަ ދުވަހުގެ ރޭ ފުލުހެއްގެ ސައިކަލުގައި ރޯކޮށްލި މައްސަލައިގައި ނ ހެނބަދޫއިން ކޯޓު އަމުރުގެ ދަށުން ދެމީހުން ހައްޔަރުކޮށްފައިވާކަމަށެވެ.
އެގޮތުން ނ ހެނބަދޫއަށް ނިސްބަތްވާ މި ދެމީހުންގެވެސް އުމުރަކީ 33 އަހަރުކަމުގައި ފުލުހުން ވިދާޅުވެއެވެ.
ފުލުހެއްގެ ސައިކަލަކަށް ގެއްލުންދީ، އިތުރު ފުލުހެއްގެ ސައިކަލެއްގައި ރޯކޮށްލުމުގެ އިތުރުން ހެނބަދޫ ޕޮލިސް ޕޯސްޓުގައި މަސައްކަތްކުރާ ފުލުހުންނާއި ފުލުހުންގެ އާއިލާތަކާއި މުދަލަށް ގެއްލުންދޭނެ ކަމަށް ބުނެ އެމީހުން އިންޒާރު ވެސް ދެމުންދާ ކަމަށް ފުލުހުން ވަނީ ވިދާޅުވެފައެވެ.
މިފަދަ ފިނޑި އަމަލެއްގެ ސަބަބުން ފުލުހުންގެ ހިތްވަރާއި ސާބިތުކަމަށް ކުޑަވެސް ބަދަލެއް ނާންނާނެ ކަމަށްވެސް ފުލުހުން ވިދާޅުވެއެވެ.
