ރީޑިން ނަގާ ދުވަހު ބިލް ފޮނުވުމަށް މަސައްކަތް ކުރަމުން އަންނަ ކަމަށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ސްޓެލްކޯގެ އެމްޑީ ފަހުމީ ވިދާޅުވީ ބިލް ކުރާ ދުވަހާއި ބިލް ލިބޭ ދުވަހުގެ ގާތްގަނޑަކަށް 25 ދުވަހާއި 30 ދުވަހުގެ ފަރަގު އުޅޭ ކަމަށާއި ރިއަލް ޓައިމްގައި ނުވަތަ ބިލް ނަގަ ދުވަހު ވަގުތުން ވަގުތުން ވަގުތަށް ބިލް ކުރެވޭ ގޮތް ހެދުމަށް އެކުންފުނިން މަސައްކަތް ކުރަމުން އަންނަ ކަމަށެވެ.
“އަޅުގަނޑުމެން އެބަ ވިސްނަން ރިއަލް ޓައިމްގައި ބިލް ކުރަން. މާނައަކީ ރީޑިން ނަގާ ދުވަހު ވަގުތުން ވަގުތަށް ބިލް ކުރުން. މިކަން ގެންދާނީ ރައްޔިތުންނާ ވާހަކަ ދައްކައިގެން،” އޭނާ ވިދާޅުވި އެވެ.
އޭނާ ވިދާޅުވީ ކަރަންޓު ރީޑިން ނެގުމަށްފަހު، ވަގުތުން ބިލް ނުފޮނުވޭ މައްސަލަ އަކީ ފާއިތުވި 15 އަހަރު ވެސް ކުރިމަތިވަމުން އަންނަ މައްސަލައެއް ކަމަށާއި މިހާރު ސްޓެލްކޯއިން ވަގުތުން ބިލް ލިބޭ ގޮތަށް ހެދުމަށް ކުރަމުންދާ މަސައްކަތަށްފަހު، އެގޮތަށް ބިލް ބޭނުންވާ ކަސްޓަމަރުންނަށް އެކަމަށް އެދުމުގެ ފުރުސަތު އެކުންފުނިން ދޭނެ ކަމަށެވެ.
މާލެ ސަރަހައްދުގައި 70،000 ގޭބީސީއަށް ސްޓެލްކޯ އިން ކަރުންޓުގެ ހިދުމަތް ދެމުން އަންނައިރު، ލަހުން ބިލް ފޮނުވާތީ ގިނަ ބަޔަކު އެކަމާއި ނުރުހި ޝަކުރާ ކުރާ ކަމަށްވެސް ފަހުމީ ވިދާޅުވި އެވެ.
މީގެއިތުރުން، ކަރަންޓްގެ ހަރަދު ބޮޑުވާތީވެ ގިނަ ބަޔަކު ޝަކުވާ ކުރާމުން އަންނަ އިރު، ފަހުމީ ވިދާޅުވެފައި ވަނީ ކަރަންޓްގެ ހަރަދު ކުޑަ ކުރެވެން އޮތް ހަމައެކަނި ގޮތަކީ އިޔާދަކުރަނިވި ހަކަތަ ބޭނުންކޮށްގެން ކަމަށާއި ސަރުކާރުގެ ވައުދަކީ ވެސް އުފައްދާ ކަރަންޓުގެ 30 އިންސައްތަ އިޔާދަކުރަނިވި ހަކަތައަށް ބަދަލު ކުރުން ކަމަށެވެ.
