ތައުލީމު ހާސިލްކުރުމަށް ބަންގްލަދޭޝްގައި މިވަގުތު ތިބި 119 ދިވެހިންގެ ހާލު ރަނގަޅުކަމަށް ފޮރިން މިނިސްޓްރީން ބުނެފިއެވެ.
ފޮރިން މިނިސްޓްރީން މިއަދު އާންމުކޮށްފައިވާ ބަޔާނެއްގައި ބުނެފައި ވަނީ ބަންގްލަދޭޝްގައި ތައުލީމު ހާސިލްކުރަނީ މިވަގުތު އެގައުމުގެގެ ޗިޓަގޮންގްގައި ތިބި 83 ދަރިވަރުންނާއި، ޑާކާގައި ތިބި ހަތް ދަރިވަރުންގެ އިތުރުން ކޮމިލާގައި ހުރި ދަރިވަރެއް ކަމަށާއި މި ދަރިވަރުންނަށް ހައިކޮމިޝަނުން ގަވައިދުން ގުޅާ ހާލު ބަލާ ކަމަށެވެ.
“މިދަރިވަރުންނާއެކު، ބަންގްލަދޭޝްގައި މިވަގުތު ތިބިކަމަށް ހައިކޮމިޝަނަށް މަޢުލޫމާތު ލިބިފައިވާ 119 ދިވެހި ރައްޔިތުންގެ ހާލު ޖުމްލަ ގޮތެއްގައި ރަނގަޅުކަމަށް ހައިކޮމިޝަނުން ވަނީ މަޢުލޫމާތު ދެއްވާފަ،” މިނިސްޓްރީން ނެރުނު ބަޔާނުގައި ވެއެވެ.
ބަންގްލަދޭޝްގެ ސަރުކާރާއި ދެކޮޅަށް އެގައުމުގައި ކުރަމުން އަންނަ މުޒާހަރާތަކާއި ގުޅިގެން ފޮރިން މިނިސްޓްރީން ވަނީ އެގައުމުގައި ދިރިއުޅޭ އަދި އެގައުމަށް ދަތުރުކުރާ ދިވެހީން މިދުވަސްވަރު އިތުރަށް ސަމާލުވުމަށް އިލްތިމާސް ކޮށްފައެވެ.
މީގެއިތުރުން އެގައުމުގެ ސަރުކާރުން ވަކި ވަގުތުތަކެއްގައި ކާފިއު އިއުލާން ކޮށްފައިވާއިރު، އެއާއި އެއްގޮތަށް އަމަލުކޮށް ބޭރަށް ނުކުމެ ނޫޅުމަށާއި ބަންގްލަދޭޝް ސަރުކާރާއި ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަންގެ އިރުޝާދާ އެއްގޮތަށް އަމަލުކުރުމަށް ވެސް މިނިސްޓްރީން އިލްތިމާސް ކޮށްފައެވެ.
މިނިސްޓްރީން ވަނީ މިހާރު ހިނގަމުންދާ ހަމަނުޖެހުންތަކުގެ ސަބަބުން އެއްވެސް އެހީތެރިކަމެއް ބޭނުންވެއްޖެ ހާލަތެއްގައި އެގައުމުގައި ހުންނަ ދިވެހިރާއްޖޭގެ ހައިކޮމިޝަނާ ގުޅުމަށް އެދިފައެވެ.
ބަންގްލަދޭޝްގައި މިހާރު ކުރަމުންދާ މުޒާހަރާ އަކީ އެގައުމުގެ ކޯޓާ ނިޒާމުގައި ސަރުކާރުގެ ވަޒީފާތަކުގެ ތެރެއިން 30 ޕަސެންޓް1971 ވަނަ އަހަރު އެގައުމުގެ މިނިވަން ކަމަށް ހަނގުރާމަ ކުރި މީހުންގެ އާއިލާތަކަށް ލިބޭ ގޮތަށް ކަނޑައަޅާފައި އޮތުމުން އެކަމާއި ދެކޮޅަށް ކުރަމުންދާ މުޒާހަރާތަކެކެވެ. މިމުޒާހަރާގެ ތެރެއިން އެގައުމުގެ ސަލާމަތީ ބާރުތަކާ އާންމުންނާއި ދެމެދު ހިނގާފައިވާ ހަމަނުޖެހުންތަކުގެ ތެރޭގައި މިހާތަނަށް 100 އަށް ވުރެއް ގިނަ މީހުން މަރުވެފައިވާ އިރު، ޖުލައި މަހުގެ 21 ވަނަ ދުވަހު ސުޕްރީމް ކޯޓުން ނިންމި ނިންމުމެއްގައި ވަނީ ގައުމަށްޓަކައި ހަނގުރާމަކުރި މީހުންގެ އާއިލާތަކަށް ޚާއްސަ ކުރާ މިންވަރު ފަސް ޕަސެންޓް ދަށްކޮށް ޙުކުމް ކޮށްފައެވެ. ސުޕްރީމް ކޯޓުން ކޮށްފައިވާ އަމުރުގައި ބަޔާންކޮށްފައި ވަނީ ކޯޓާ ނިޒާމުގެ ދަށުން ވަޒީފާތަކުގެ 93 ޕަސެންޓް ދޭން ޖެހޭނީ ގާބިލުކަމަށް ބަލައިފައި ކަމަށެވެ.
