ސަރުކާރުން ޓެކްސީ ލައިނެއްގެ ހިދުމަތް ފަށަން އުޅޭތީ އެކަމާ ކަންބޮޑުވުން ފާޅުކޮށް ޓެކްސީ ޑްރައިވަރުން ހުޅުމާލޭގައި މިއަދި ކުރި މުޒާހަރާގައި ޑްރައިވަރުންގެ ކަންބޮޑުވުންތަކަށް ހައްލެއް ހޯދައިދޭނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވުމުން މުޒާހަރާ ހުއްޓާލާފައެވެ.
ޓެކްސީ ޑްރައިވަރުން ވަނީ ހުޅުމާލެ 1 ގައި ޓްރާންސްޕޯޓް މިނިސްޓްރީ ހިންގާ އުމަރު ޒާހިރު ބިލްޑިންގެ ބޭރުގައި ޑްރައިވަރުން މުޒާހަރާ ކުރަން ފަށާފައި ވަނީ ޓްރާންސްޕޯޓް މިނިސްޓްރީ އާއިއެކު މިއަދު ބޭއްވި ބައްދަލުވުމުގައި ޑްރައިވަރުންގެ ހުށަހެޅުންތަކަށް މިނިސްޓްރީން އެއްބަސް ނުވުމުންނެވެ.
އުމަރު ޒާހިރު ބިލްޑިންގެ ބޭރުގައި ކުރި މުޒާހަރާގައި ޓެކްސީ ޑްރައިވަރުން ވަނީ އެ މީހުން އާމްދަނީ ހޯދުމަށް ކުރާ މަސައްކަތުގެ ތެރެއަށް ސަރުކާރުން ވަންނަން މަސައްކަތްކުރާ ކަމަށް ބުނެ ސަރުކާރުގެ މައްޗަށް ތުހުމަތު ކޮށްފައެވެ. އަދި ސަރުކާރުން ޓެކްސީ ހިދުމަތް ދޭން ފެށުމުން އެ މީހުން ހާލުގައި ޖެހޭނެ ކަމަށް ވެސް ބުނެފައިވެ އެވެ. މިމުޒާހަރާގައި ޓެކްސީ ޑްރައިވަރުން ވަނީ ޓްރާސްޕޯޓް މިނިސްޓަރު މުހައްމަދު އަމީންގެ އިސްތިއުފާ އަށް ވެސް ގޮވާލާފައެވެ.
ޓްރާންސްޕޯޓް މިނިސްޓްރީ އާއިއެކު މިއަދު ބޭއްވި ބައްދަލުވުމުގައި ބައިވެރިވި ޑްރައިވަރުން ވަނީ ސަރުކާރުން ޓެކްސީ ލައިނެއް ހެދުމުން އާމްދަނީ އަށް ނޭދެވޭ އަސަރު ކުރުނެ ކަމަށް އަދި ޓެކްސީގެ ހިދުމަތުގައި އުޅެވޭނެ މާހައުލެއް ނެތުމުގެ އިތުރަށް ރޭގަނޑު ވެހިކަލްތައް ޓޯކުރާ މައްސަލަ ފާހަގަކޮށްފައެވެ.
އެބައްދަލުވުމުގައި ބައިވެރިވި ޑްރައިވަރުން ބުނެފައިވާ ގޮތުގައި ޓެކްސީ ޑްރައިވަރުންގެ ކަންބޮޑުވުންތަކާއި މެދު މިނިސްޓްރީން ބުނީ މިހާރު އަޅަމުންދާ ފިޔަވަޅުތަކުގެ ސަބަބުން ޓެކްސީ ޑްރައިވަރުންގެ ދިރިއުޅުމަށް އުނިކަމެއް ނާންނާނެ ކަމުގެ ޔަގީންކަން މިނިސްޓްރީން ދޭ ކަމަށެވެ. އަދި މިހާރު ޕްލޭންގައި އޮތީ އެކަމާއި މެދު ދިރާސާއެއް ކުރުންކަމަށް ވެސް މިނިސްޓްރީން ބުނެފައިވެއެވެ.
ރާއްޖޭގެ އޮންލައިން ނޫހެއްކަމަށްވާ ‘މިހާރު’ ނޫހުން މުޒާހަރާއިގެ ބައިވެރިއަކާއި ހަވާލާދީ ރިޕޯޓްކޮށްފައިވާ ގޮތުގައި ޓެކްސީގެ ހިދުމަތެއް ސަރުކާރުން ފެށި ނަމަވެސް އެ ވިޔަފާރީގައި ތިބި މީހުންގެ ހިދުމަތަށް ބުރޫނާރާނެ ކަމުގެ ޔަގީންކަން މިނިސްޓަރު ވަނީ ދެއްވާފައެވެ.
