މެޓާއިން ޔަހޫދީންނަށް ތާޢީދު ކުރުމުގެ ގޮތުން ގިނަ އަމަލުތަކެއް ހިންގަމުންދާކަމަށް ދުނިޔޭގެ އެކި ކަންކޮޅުތަކުގައި ޤައުމުތަކުން ތުހުމަތުކުރަމުންދާ މި ދަނޑިވަޅުގައި ތުރުކީވިލާތުން އިންސްޓަގްރާމް ބްލޮކްކޮށްލައިފިއެވެ.
އިންސްޓަގްރާމަކީ މެޓާ ޕްލެޓްފޯމްސް އިންކޯޕޮރޭޓެޑް (މެޓާ)ގެ ދަށުން ހިންގަމުންދާ މަންސައެކެވެ. ތުރުކީވިލާތުން އިންސްޓަގްރާމް ބްލޮކްކޮށްފައިވަނީ ތުރުކީވިލާތުގެ ޤާނޫނުތަކަށް ބޯލަނބަން ދެކޮޅު ހެދުމުގެ ސަބަބުންނެވެ. އެގޮތުން ތުރުކީވިލާތުގައި އިންސްޓަގްރާމް ބްލޮކްކޮށްފައި ވަނީ ކޯޓު އަމުރެއްގެ ދަށުންނެވެ.
އެ ޤައުމުން ތުހުމަތުކޮށްފައިވާ ގޮތުގައި އެ ޤައުމުގެ ސަރުކާރުގެ އިސް ވެރިން ފަލަސްޠީނުގެ ޙައްޤުތަކަށް ވަކާލާތުކޮށް އާންމު ކުރާ ޕޯސްޓުތައް މެޓާއިން ގެންދަނީ ފޮހެމުންނެވެ.
ޣައްޒާގައި ވެރިކަން ކުރާ ޙަމާސް ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ ޝަހީދު ކޮށްލުމާ ގުޅިގެން ތުރުކީވިލާތުގެ ސަރުކާރުގެ އިސްވެރިން އެ ކަމުގެ ހިތާމަ ފާޅު ކުރުމުގެ ގޮތުން ކުރި ޕޯސްޓްތަކެއް ވެސް އިންސްޓަގްރާމުން ވަނީ ރިމޫވްކޮށްފައެވެ.
ތުރުކީވިލާތުގެ ދަތުރުފަތުރާއި ޢުމްރާނީ ތަރައްޤީއާ ބެހޭ ވަޒީރު ޢަބްދުލްޤާދިރު އުލަލޯލޯ، އެ ޤައުމުގެ މީޑިއާތަކަށް ވިދާޅުވި ގޮތުގައި އެ ޤައުމުގެ ސަރުކާރުން މިހާރު ގެންދަނީ އެ ކުންފުންޏާ މަޝްވަރާ ކުރަމުންނެވެ. އަދި ތުރުކީވިލާތުން ބޭނުންވާ ކަންކަން އެ ކުންފުންޏާ ހިއްސާ ކޮށްފައިވާނެކަމަށާއި، އެ ހުށަހެޅުންތަކަށް ބޯލަނބަން އެ ކުންފުނިން އެއްބަސްވުމުން އަންބްލޮކްކޮށް، އަލުން އެކްސެސް ދިނުމަށް ނިންމާފައިވާކަމަށް އުލަލޯލޯ ވިދާޅުވެފައިވެއެވެ.
ތުރުކީވިލާތުގެ މުވާސަލާތާ ބެހޭ ވަޒީރު، ފަހްރުއްތިން އަލްތުން ވެސް ވަނީ ކަންބޮޑުވުން ފާޅު ކުރައްވައި، މެޓާގެ އަމަލުތައް ކުށްވެރިކުރައްވާފައެވެ. އެ މަނިކުފާނު ސިފަކުރެއްވި ގޮތުގައި މެޓާގެ މި އަމަލުތަކަކީ ޚިޔާލު ފާޅު ކުރުމުގެ މިނިވަންކަމަށް ހުރަސް އެޅުމުގެ ގޮތުން ހިންގޭ އަމަލުތަކެކެވެ.
ތުރުކީވިލާތުގެ ތުހުމަތުތަކާ ގުޅިގެން މެޓާއިން އަދި ވަކި އެއްޗެއް ނުބުނެއެވެ.
ފަލަސްޠީނުގެ މުސްލިމުން ނެތިކޮށްލުމަށް ޔަހޫދީން ހިންގަމުންދާ ލާއިންސާނީ ޢުދުވާނާ ގުޅިގެން އެންމެ ފާޅުކަން ބޮޑު ގޮތެއްގައި އަޑުއުފުލާ ޤައުމުތަކުގެ ތެރޭފައި ތުރުކީވިލާތް ހިމެނޭނެއެވެ.
